唔少朋友去台北都必定會到上引水產食新鮮刺身，早於4個月前，台北中山區就新開了間海鮮丼餐廳，由於CP值極高，餐廳日賣500碗丼飯，人氣爆燈！王牌波士頓龍蝦更加成座山咁高，超過10種刺身勁足料，真心覺得一個人冇可能食得晒囉！
記者：阿妹今晚去旅行 攝影：2tung
曾在五星飯店任職壽司師傅的老闆，於6月開設餐廳，主打海鮮丼物及日式料理，加上價錢大眾化，甫推出便人氣高企！望望menu，發現定價低得有點擔心，不過唔好以為平嘢冇好，原來老闆每日凌晨兩點都會親自到基隆漁港入貨，確保海產新鮮，可以放心盡情食！
山咁高龍蝦丼 日售過百碗
一場嚟到，當然要試食波士頓龍蝦丼。甫上碟發現丼飯成座山咁高，刺身方面超豐富，除了手掌大的波士頓龍蝦及基隆鮮鮑魚，仲有花蓮曼波魚、肥美鰤魚、宜蘭胭脂蝦、金槍魚及基隆旗魚等10種刺身，超足料！由於店主每日取貨，龍蝦丼刺身會就當日購得的海產而有所調整！刺身方面，宜蘭金槍魚及基隆旗魚都新鮮肥美，非常唔錯！講到最驚喜，絕對是原隻上的波士頓龍蝦，龍蝦入口彈牙味美，啖啖肉勁正，而師傅亦將蟹鉗鉗好，方便客人食用，超細心。
＄50食巨型鬼爪丼
除了海鮮丼，餐廳另一王牌是巨型鬼爪丼，豬肋骨比手掌還大，食肉獸必食！豬肋骨味香甜可口，非常入味，肉質非常鬆化，送飯一流。此外，餐廳備有手套供客人使用，客人可以盡情勁食，超滿足！
