關於護照，阿珍我都試過拎住十年前申請嘅護照去旅行，由於歲月催人，將近過期護照上的芳容，當然變了樣，結果被 機場安檢 人員掃視十遍仍半信半疑的情況屢試不鮮，而且在歐洲更為嚴重，因為西方人辨認東方人面孔始終較困難，試過一次入境斯洛伐克，連身分證和駕駛執照也拎埋出來給關員對照！
不過行內有個講法：
「入境對餐死，出境話知你。」
即是對於出境旅客，由於責任不在本國，關員都顯得較寬。阿珍亦有同感，出境時關員都不會驗屍一般核對護照，而且嘴臉也通常好得多，問下「旅程去過邊、玩得開唔開心」，與入境時截然不同。
情侶出境泰國，交換護照都過到？
在朋友圈中聽過最離譜的一個 case ，係一對情侶出境泰國時，錯誤交換了護照用，結果多嘴的關員只顧搭訕，二人先後順利過關！事實上這對情侶高矮臉相體形都係兩個極端，如此狀況也可以調轉護照用，實在係千奇百趣。
阿珍亦聽過啱啱從吉隆坡返港的旅遊記者K講，她一時大意放在背包內的半滿的水樽也安然過到關，（當然記者K自己也有責任啦！）雖然漏洞不時出現，但奉勸各位千萬唔好立亂幫人拎嘢過境，最近的走私運毒新聞已經一再驗證，以身試法真係冇好下場！
閘口核對好重要 拜託旅客勿鼓譟
不過，阿珍剛巧從澳洲返港，在櫃位 check-in 時，連櫃位的地勤也非常仔細核對護照和相。問及在港當地勤的姊妹Ｃ，自從早幾年發生過交換登機證事件後，地勤在閘口登機前都要加強核對護照，除了對名字還要對樣貌，有時候登機人數多，客人鼓譟又要地勤受氣，但明明安檢是關員的責任，姊妹Ｃ都呻到一肚火！