IKEA推Staycation設備超齊全自稱情侶首選港人狂讚值得住

Staycation熱潮仲未完，連香港IKEA都跟上風潮，在4月1日推出Staycation服務，要同一眾高級酒店爭高下！IKEA話自己嘅Staycation係情侶浪漫首選，可以歎日落美景之餘，仲設備齊全，配備多樣先進傢俬電器，平時更相當熱鬧，人山人海，簡直人見人愛！你又會唔會想住呢？

撰文：CY｜圖片來源：IKEA HK

IKEA推Staycation設備超齊全自稱情侶首選港人狂讚值得住

IKEA官方介紹話Staycation服務包括有120間禁煙客房，設備齊全，房間廁所擁有「全球首創2D馬桶」，提供超嶄新如廁體驗，仲有（對外）開放式套房的半開房式廚房可供使用，不定期有陌生人參觀，相當熱鬧。Holiday driver都唔使怕，IKEA有提供免費體驗泊車服務，入面仲有相當多兒童玩樂設備，無論係情侶、家庭定係朋友聚會都貌似相當適合！

IKEA推Staycation好吸引？原來係愚人節大整蠱！

不過要留意，IKEA自己都話斷水斷電，萬一入住有咩冬瓜豆腐就惟有閣下自理。點解咁霸氣？原來係因為搞一場大龍鳳，結果係IKEA嘅愚人節大整蠱，全部相片都係香港IKEA嘅店舖相片。不過加個caption就變得似模似樣，比起五星酒店都毫不輸蝕，又真係相當fake到下人。

全球首創2D馬桶，（假）評論話唔洗怕水花濺起，夠晒方便！（圖片來源：IKEA HK） — 全球首創2D馬桶，（假）評論話唔使怕水花濺起，夠晒方便！（圖片來源：IKEA HK）

好多聰明嘅網民一眼洞悉係愚人節笑話，似乎都未見失望，笑住讚好抵住之餘，仲話今個復活節Staycation有著落，唔使怕再重演情人節Staycation，喺前台排隊迫餐飽咁話！有網民更加力讚香港IKEA編輯靚抽、做到嘢，一路留言幫IKEA小編R加人工，唔知道今次IKEA編輯的做法大獲好評，會唔會有人工加呢？

記得點擊相片看完相片captions，全部都超搞笑又精警！