柴灣茶記餐牌風格極獨特！
前日（1月7日）Facebook群組「香港茶餐廳及美食關注組」帶圖發文，分享一間小西灣茶記的餐牌，並以短短一句「可能有人會睇到開打MMA」描述相片。由相片可見，一塊掛在牆上的是日餐牌上面寫著A至L餐共12個選項，但落筆之人的筆跡風格十分獨特，字體工整但字跡縱橫交錯，部分筆劃更會與其他字交疊，加上大大隻的字配上極幼的筆跡，猶如「蜘蛛體」般密密麻麻地填滿了整塊餐牌。想要完全解讀這塊是日餐牌，必須十分用心及費時！
網民意見超兩極：高手在民間 VS 睇到燥底
這張餐牌意外在群組內引起大批網民熱烈討論，一部分網民大讚寫字之人功力十足，整張餐牌充滿藝術感賞心悅目：「現在手寫已好難得，而咁有特色，值得嘉許！」、「可以加入去MS office 做其中一種字型，好特別！」、「被茶餐廳耽誤咗嘅藝術家，應該擺喺M+」！更有從事設計工作的網民大讚：「筆者故意字貼字，不作分隔行距同間距，形成一幅有如畫作的餐牌！」
但亦有網民指餐牌的存在意義是讓食客一睇就明，這張極具風格的餐牌卻是與初衷背道而馳，除了食客難睇之外，也會加重伙記工作量：「睇到都唔想食」、「年紀大睇到眼花」、「睇得有啲辛苦，繁忙時段啲客同伙記可能會炆」、「啲夥計好唔得閒，成日俾人問」、「字係靚啦，但筆無墨，筆劃仲要打晒交都真係睇死人」！亦有網民認為這張餐牌極為趕客：「寫成咁，要有返咁上下耐性兼睇得明，才品嘗到佢哋嘅美食…well，我好趕時間，叫第二個慢慢睇吧，我寧願食第二間！」
網民完美解讀餐牌！
最後有網民以解謎方式解讀了這張獨特餐牌，以下就為你對答案，看看你答中幾個？
A. 木盆胡椒豬肚雞窩 $90
B. 瑤柱金菇扒豆苗 $88
C. 土魷肉餅拼鳳爪 $85
D. 回味醬爆大腸雞煲 $90
E. 無骨蔥油雞 （半隻，不包餐）$95
F. 醬爆雲耳翠玉瓜豬頸肉 $85
G. 醬皇牛柳粒四季豆 $85
H. 蜜桃脆皮咕嚕肉 $85
I. XO醬西蘭花炒斑塊 $86
J. 豉汁蒸䱽魚 $90
K. 豉汁蒸雙黃花 $98
L. 清蒸龍躉仔 $115
今日轉人寫：無咗隻藝術feel！
而今日有網民再到同一間茶餐廳用餐時，意外發現今日的「是日餐牌」已改為令一位伙記書寫，有小部分網民感到十分可惜：「無feel呀今日」、「鍾意之前嗰個師傅」、「之前個餐牌正好多」；大部分網民則認為今日的字體又靚又易睇，更為欣賞今日落筆之伙記：「呢次清楚好多，手字都寫得好靚」、 「呢啲先似中文字」、「正常人手筆！藝術字體，要估佢寫乜！」
