結婚是人生大事,而難忘的婚禮亦是很多準新娘的夢想!除了華麗的衣裝、適合的場地,充當帶動氣氛這角色的司儀亦是重要的一環,但若然司儀說錯一些話,分分鐘會令婚禮場面大尷尬,甚至激怒各大親朋戚友!即睇下以下幾個「難忘」的婚禮司儀發癲實錄!
婚禮司儀「炒車」實錄
「司儀」確係一個專業嚟㗎!最近就有網民喺討論區發起「一人一個婚禮司儀黐咗線嘅一刻」,將自己喺婚禮上遇過最尷尬嘅情況羅列出嚟,有啲都真係幾大吉利是㗎!
自high系列
「司儀係一男一女外面請,冇人識,無啦啦去到中間,男司儀話個女司儀今日生日,要全世界陪佢唱生日歌 + 畀驚喜個女司儀!」
「司儀講講吓嘢講到喊晒,然後話原來個新娘係佢鍾意咗好多年嘅女神,然後無啦啦大叫咩『哈利路亞 CHANCE』!」
「新人同家人親戚朋友影相,影影吓,個MC嗌:『而家有請MC上台影相!』,然後自己衝上台」
「個司儀玩到無嘢好玩,無啦啦叫我老豆咀我老婆個老母,下面班XX仲大大聲叫咀佢!咀佢!搞到我外父同我老母黑曬面 !!!」
「親戚係茶樓擺左十零圍,有個駐場大嬸司儀:『雖然今晚圍數唔多,但我地都用最熱烈既掌聲歡迎一對新人』」
MC:「恭喜一對新人走上呢條不歸路………er……..幸福之路!!」
大吉利是系列
MC:「我哋一齊睇番一對新人生前嘅片段」
「試過個 MC 叫: 『有請女家外母慈雲閣嘅鄰居』,外母住慈雲山啲屋村,但係慈雲閣係放骨灰果啲寺」
「試過去飲,新郎新娘多謝完四大長老之後,MC話: 『多謝完就要有啲表示啦,我地而家請新郎新娘向父母三鞠躬致謝』,新郎新娘又真係照做,四大長老塊面黑到!」
睇完以上嘅炒車經歷,令人更加明白請個可靠婚禮司儀嘅重要性!大家將來結婚嘅時候,記得「帶眼」搵司儀喇!祝大家有個浪漫又美好的婚禮。
圖片來源:Sunday Kiss、新傳媒資料室、《抱抱俏佳人》劇照、《必娶女人》劇照、林盛斌FB專頁、IG