大學教授佛都有火 致電網台匿名鬧爆學生
日前，有一名自稱大學教授的網台觀眾，致電YouTube頻道JFFLive開宗明義要「X臭啲學生」，他訴說「自問是個俾分幾鬆手嘅教授」，與人為善，學生考試時他都寬鬆處理他們翻查筆記、教科書，用手機上網搜尋答案，甚至有技巧地作弊能說得過去的，他都可以接受，但他卻怒斥以下5大學生愚蠢的行為。
1. 可自行查閱筆記、上網搜尋答案下仍然偷看隔離同學的答案
教授鬧爆學生在上述寬鬆處理的情況下，學生仍然選擇偷看隔離同學的答案作弊，質疑該學生「智商係咪有問題」；教授指出他居高臨下式或在試場後方的位置監考，有一名身高180厘米的男生不斷閃縮在前座女生後面，躲避教授的目光作弊，但教授則怒罵「20、30個人型物體的姿勢係一樣，你以為我望唔到你？！」任何異動根本都無可能逃出教授的法眼，「你好突出㗎，天才！」當該學生發現教授正在注視他時，學生佯作四周看為尋找時鐘計算剩下的考試時間，教授卻篤爆「上咗成個學期，你而家先搵鐘？！」對於已上堂幾個月的場地而不知時鐘的位置，未免欠缺說服力，教授不禁質疑該名學生「是否智商有問題」。
2. 愚蠢地作弊連累教授加重工作量、被上司責備
教授坦言，學生「有創意、有技巧地出貓，我咪當中忍考試（日本漫畫《火影忍者》及其衍生作品中的晉升考試，是下級忍者各出奇謀晉升中級忍者的場合），睇唔到就算X數啦！用埋啲白痴的方法出貓，係挑戰緊我智商！」又指他捉學生作弊還要向上司提交報告，又會被上司責難「點解俾咁多F級？」教授說到痛處，連上司一併鬧爆，「你唔問下其他教授，佢智障都俾佢合格？呢間係大學定庇護工場呀？！」。
3. 作弊的答案錯的都一樣、明目張膽地在Discord問答案
另一令教授動氣的作弊行為，教授形容為「一個白痴抄另一個白痴，抄完都係B，全部錯埋同一樣嘢，連選擇題都錯得一樣，我點X樣唔捉你出來呀！你全部啱晒，我捉唔到呀嘛！」。教授繼續怒沖沖地表示，去年用Zoom教學，學生因而不能偷看鄰座的答案之下，卻在教授作為Admin所開的Discord（專為社群設計的免費網絡實時通話軟件）問其他同學答案作弊。教授罵得興起，順度發洩對遙控教學的不滿，因與學生「零互動」，他嘲諷自己的情況比「得兩個觀眾的直播台還差」，令網台主持人及一眾製作組身同感受，爆笑連連。
4. 重用親人去世當藉口延遲考期、增教授工作量
教授又不恥學生重複使用親人去世為由作為藉口，拖延考期，意圖等其他同學如期參考後，獲知考題，但教授則指：「年年都有兩個死阿婆，年年都有兩個屋企破產，我唔要求你出示死亡証証明，係我仁慈，你估你遲一星期考就會過到？你以為可以問其他同學攞卷知道試題，我當然要加班重新出過份卷，咁我加班出卷，當然會難10倍！」
5. 不夠分數𢯎高一級的學生
教授重申，他一向「自問是個俾分幾鬆手嘅教授」，與學生為善，如學生已達A-或B+，他都自動「升呢」給予A，但他又再激動地說「X街，你拎個B嚟問我可唔可以攞A？咁X無恥，你同我講我真係好需要GPA，有邊個唔洗GPA、有邊個想不合格呀？叫你俾個原因，學生又係講埋啲死阿公阿婆，一年死4、5個阿婆，黐x筋！」
網民盛讚教授高質 相逢恨晚
片段一曝光，教授鬧爆學生竟然獲網民高呼「好搞笑」，「中忍考試真係忍唔到笑」、「俾呢位教授講完之後，深刻體會到做老師嘅壓力」、「老師唔會嬲你地唔讀書懶惰，係嬲你地蠢」，甚至有網民大讚「好老師，細個遇到就好了」，令人意外。
