英鎊匯率創37年新低 專家：「睇定啲先唔好心急」
美元強勢下，英鎊持續走弱，美國聯儲局近期再議加息幅度，令美元急升。加上英國當地能源價格上升，市場對英國經濟前景有一定的憂慮，袁偉基指俄烏戰爭不斷，俄羅斯尚未重開北溪一號天然氣管道，令能源價格上升。而英國正準備踏入冬季，若能源價格及供應情況未能改善，當地生活備受影響，市場的不信任態度將會再度提升。「英國而家通脹問題嚴重，但似乎英國未有意透過加息改變情況，早前英方曾預期通脹問題會於10月到頂，因而未有作出任何行動去解決通脹問題，意思即等待自然回落的時機，但情況確實未必樂觀。」
英國踏入冬季通脹問題或變嚴重 英鎊有機會跌穿8算
袁續指，英國一般都較早踏入冬季，暖氣問題緊張，加上俄羅斯近日表示或會使用核武，各國對其收緊取態未有改變，相信北溪一號未必太快重新運作，令英國能源價格上升。在美金強、戰爭未止的雙管齊下，英國仍抱觀望態度未有作出反應，市場明顯沒有太大信心，「其實真係有可能重現1976年危機，除非英倫銀行出手干預，如果唔係真係有機會跌穿8。英國唔同日本，日本仍可以靠開關復興旅遊業頂上去，但英國一早開晒關都無咩大反應，估計今年內都未必升得返上去。」
移民港人「蝕入肉」：買咗樓就真係慘
英鎊跌，並非每個港人都表示高興，有移英港人今在討論區表示「通脹買咩都貴，但啲錢越嚟越唔見使，身家縮晒水」。袁指移民港人受到最大影響，因在當地生活逼不得已必須兌換英鎊，接下來冬季日子或更難捱。「基本上過咗去生活嘅，如果買咗樓，到而家為止最少蝕咗1成，身家都大減，真係蝕入肉。嚟緊走勢未必太樂觀，大家要有心理準備，能源消費都係一個問題。」
現時為趁低吸納好時機？ 袁偉基：睇定啲先唔好急！
對於英鎊走勢認為「有排跌」的袁指，已移民人士沒有太多選擇，反而準備移民或想存貨的港人則建議「睇定啲」。「好早期兌換咗英鎊嘅人其實唔著數，準備移民嘅人可以當趁低吸納，但現時仍未跌到最低，大家可以再睇定啲先，唔好心急，一次過換太多又唔係急用，到時又係蝕。」相反，由於美元和港幣掛勾，手持這2種貨幣會較安全。
