撰文：Kitson、東方新地、C Lam@Central、對白Cap圖王｜圖片來源： 電視截圖、黃子華facebook、東方新地、東星娛樂｜編輯：C Lam@Central
黃子華成名血淚史大公開 歷盡磨練成就今日的神
自小破碎家庭成長
黃子華成長於破碎家庭，小時候父母離異，跟隨母親生活的他，對父親認知不多，更得不到後父關心，與三名同母異父的弟妹因年紀差距太遠而少溝通，令他思想變得負面。也可能因為這原因，他從小便學會不輕易屈服，長大之後，更在加拿大考獲「哲學學士」，讀一科別人看起來離經叛道的科。
小時叛逆貪玩 留下人生污點
子華的童年過得並不快樂，和親人時不時吵架，外婆又對他不好，來自破碎家庭的他，從小就缺乏家庭溫暖。可能因為家庭原因，子華小時候非常叛逆。在小三時曾經試過逃學和偷竊，被繼父發現之後「打鑊甘」，中三和同學出海玩，又擅自開別人的船出海，被船主發現後報警，被判守行為2年，成為人生的污點。
他說過： 「我看到的世界充滿痛苦，或者因為這樣，世界才充滿好笑。」喜歡從自身思考他與世界的關係，看到別人看不到的事情，可能就是他棟篤笑的創作泉源。
情路同樣坎坷
57歲的黃子華入行多年，親口承認的女友卻只有三個，而且每次拍拖都頗為長情，但就一直未肯結婚。在訪問中，他曾透露自小父母離異，令他對婚姻有陰影。
24歲時，子華與無綫藝員潘芳芳拍拖，六年後因有第三者介入而分手。
98年與模特兒Sharis(劉婉君)在夜店認識而撻著，拍拖不久便於何文田同居，有說家境富裕的Sharis當時受家人反對，但她一於少理，經常和子華揸住法拉利遊車河。00年子華演出《男親女愛》與鄭裕玲傳緋聞，有說Sharis為此仰藥入院，02年兩人終於分手。
愛上人稱「翻版關詠荷」的化妝師溫安妮(Annie)，女方比子華年輕十六年，由2002年開始和子華拍拖至2011年，拍足九年拖。兩人於何文田同居共築愛巢，有指該單位是子華送給女方的，據稱因Annie曾多次迫婚不遂，結果分手收場。當年與溫安妮分手後，有指子華極之傷心，茶飯不思，體重急劇下降，又紋身紀念已逝的戀情，未能忘情的他，更與母及妹搬出和女友同居多年的何文田。
被稱為影視毒藥
黃子華是以編劇的身分在娛樂圈出道，從編劇做到小演員，再演話劇甚至電台DJ，嘗盡娛樂圈辛酸，但沒有一樣是成功的。他甚至自嘲式地對某個劇組的導演說：「請不要在演員名單上寫上我的名字，因為寫上我名字的劇，沒有一部能紅的。」
他在2002年自編自導自演的《一蚊雞保鑣》在上映後只有11萬票房，無聲無息上映了5日，但之後重看反而評價更好。面對演藝事業的不順，黃子華毅然在1990年引退。但他並沒有在娛樂圈上從此銷聲匿跡，而是用另一種方式繼續自己的演藝事業：棟篤笑。
「子華神」前後花了將近九個月的時間，創作了他人生第一部棟篤笑，叫《娛樂圈血肉史》。他將自己在娛樂圈打滾的辛酸變成笑中帶淚、充滿自嘲意味的笑料，換來全場觀眾雷動的掌聲，正式展開他人生的另一頁。在二十年之後，他又創作《娛樂圈血肉史2》，同樣充滿智慧，賺人熱淚。
當時在籌備第一場棟篤笑《娛樂圈血淚史》的時候，子華非常擔心銷情，畢竟前車可鑑，他的好兄弟林祖輝跟他一起四圍貼街紙，又仗義幫忙幕後工作，連申請文化中心開騷的表格，都是他幫子華取得，「棟篤笑」這個名字更是兩人一起想出來，所以今次子華開騷見到好友兼恩人都忍不住流下男兒淚。
面對眾多的質疑與冷嘲熱諷，「子華神」並沒有放棄，努力終於得到回報，奠定他在香港「棟篤笑鼻祖」的地位。當問到他做棟篤笑快不快樂時，他認為講詞必須把他先逗笑，他才收貨，他每天都在逗自己笑，怎麼會不開心？當然，在很深刻的層面來說，當然不會覺得快樂。他認為世界必然是充滿痛苦，才能看見世界是充滿好笑事情的。
棟篤笑成功令黃子華重回電視和電影的大銀幕，他在2000年與Do姐合演的處境喜劇《男親女愛》成為該年TVB的最佳劇集。這部為他度身訂造的電視劇，讓他充分展現嬉笑怒罵的風格，探討「子華神」的愛情觀。
為拍電視劇患上抑鬱症
子華曾經因為拍劇抽離不到角色而一度患上抑鬱症，在2001年，他在內地拍攝電視劇《溥儀和他的五個女人》時，出演溥儀一角，因為太過投入角色而不能自拔，而且因為角色需要拼命減肥，所以患上抑鬱症。果然太過敬業，也會有反效果。
之後在拍攝《一蚊雞保鑣》期間的一幕飛車場面差點鬧出人命，幸好掉落海的特技師傅有驚無險拾回性命。對於第一次執導的子華而言，這是驚心動魄的經歷。從拍攝到把電影放上大銀幕的過程確實不易。
黃子華的成功確實有血有淚，但沒有一定的才華，也不可能造就「子華神」的神話。看看近期他的棟篤笑場場爆滿、一票難求，就知道他在香港人心中的神位是無人能取代的。
男神即將引退，有人說他在事業最高峰時退下是江郎才盡，有人說他因為創作的精神壓力太大，不得不退下。但他充滿智慧的說詞、笑中帶淚、言之有物的棟篤笑風格是獨一無二的，而他奮鬥的經歷更是值得年輕的一輩去學習。
黃子華《金盆?口》超感動鳴謝故事合輯重溫 細數16位鳴謝人物
Day 1 (6/7) Kitty葉潔馨
黃子華於《金盆?口》第一場中，首先多謝其早年在港台及商台工作時的上司葉潔馨(Kitty)，因為全賴對方的包容和鼓勵，全賴對方隻眼開隻眼閉，容許佢無心工作但專心搞棟篤笑，子華第一個棟篤笑先得以誕生。子華又稱如果遇唔到呢個上司，一切都會變得不一樣，笑說自己30年前可能已經去咗炒樓！
Day 2 (7/7) 歐陽應霽、阿四、林祖輝
黃子華呢晚多謝幾位商台時期的朋友，子華憶述第一個棟篤笑係在文化中心一個只能容納三百幾人的小劇場舉行，自己從未試過認真籌備一次表演，全賴著名跨媒體創作人歐陽應霽為佢設計宣傳海報。子華笑稱當時歐陽應霽收費不菲，但對方完全冇收自己錢！
好兄弟林祖輝
之後到子華識於微時嘅林祖輝！子華多場騷都在台上提到祖輝，表示當年自己第一次開棟篤笑時，因擔心銷情慘淡而到處貼街招宣傳，幸得祖輝仗義幫忙，其間更講到哽咽。子華稱：「林祖輝你一個高大靚仔嘅人，你做咩要幫我做呢啲嘢呢？點解有啲咁好嘅人呢？」有報道更指出，當年係祖輝幫子華去紅館攞表，申請文化中心個場地；2003年時，子華公演《無炭用》時撞正「沙士」，祖輝仲幫手喺門外派口罩畀觀眾入場，真係好兄弟！
子華後台哭成淚人
子華呢晚完騷後一入後台，就見到好兄弟林祖輝原來嚟咗捧場，子華激動到一見到祖輝就挨喺佢肩膀喊，朋友都立即遞上紙巾畀佢拭淚。
子華同祖輝相識逾30年，1988年二人在商台有份主持節目《咪前7先鋒》，大家認得子華嘛？
Day 3 (8/7) 黃霑
黃子華提到已故的黃霑(霑叔)，子華坦言當年不認識霑叔，但霑叔在其老闆口中得知佢將要開首次棟篤笑後，竟然相約子華到君悅酒店食飯，並送上大疊關於棟篤笑及笑話的書籍！子華坦言霑叔係個大忙人。「佢話啱啱寫好一首詞，掙夠呢個星期嘅錢，所以就來見見我。當時佢已經係個好大嘅才子，完全係一種無私，基於一片好意！」
Day 4 (9/7) 威廉
黃子華多謝商台的老友陶威廉，子華表示自己以前並不講究衣著，不修邊幅，只在乎自己表演如何，但其實著咩衫係非常重要！所以全靠威廉多年前開始幫子華揀衫出show，仲會一齊飛去日本試衫買衫。「去日本買件衫？街口有日本城喎！」子華笑指今次棟篤笑冇中場休息，唔使換衫好輕鬆，但威廉最後為佢每一場揀一套衫！
另外，子華多謝負責髮型的Helen，因為對方要忍受自己唔願日日洗頭、日日個頭成隻癩皮狗咁；負責化妝的佩佩亦是非常辛苦，因為子華從來都唔去做facial。子華感激三位為佢造型不辭勞苦的戰友！
Day 5 (10/7) 陸離女士
黃子華感激一位文化界的前輩、作家陸離女士。事緣子華於1990年做了第一個棟篤笑後，陸離女士在報紙專欄為子華大力宣傳，連續十幾廿日寫的內容都係同子華有關，甚至花大量金錢買飛請人去睇子華個show，所以子華道：「某程度上，黃子華都係由陸離女士帶畀香港認識的。」
Day 6 (11/7) 經理人May
黃子華多謝非常疼愛自己的經理人May，原來May當初竟曾勸子華唔好做娛樂圈。「佢話你睇下閣下副尊容，何必浪費青春呢！」說罷全場爆笑。大家都知道經理人收入主要係抽佣金，但子華笑說May竟然經常勸子華唔好接呢樣唔好做嗰樣工作，好似唔想搵錢咁！事實係兩人關係像家人一樣。
另一位子華要多謝的係主辦單位方面的Priscilla，子華表示今次《金盆?口》本來只打算做15場，點知對方一句：「黐線！」最後今次棟篤笑開足26場，全賴Priscilla造就呢個機會畀子華同大家講再見！
Day 7 (12/7) Wing、光輝、Keith
子華表示冇咗呢幾位朋友，棟篤笑一定唔會順利，首先係舞台監督羅金榮(Wing)，子華大讚對方係一個非常盡責的人。「甚至我唔夠瞓，係佢要食安眠藥！」之後仲有負責一切在音樂方面的創作、安排的光輝，子華大讚佢係個充滿工作熱誠、盡百分之四百努力嘅人。最後係一位猶如子華細佬的朋友Keith，原來子華過去幾年的短片都係由Keith操刀。
Day 8 (13/7) 丘亞葵
邊位係丘亞葵？ 原來丘先生係第一個帶子華到廣州開騷的人物，子華坦言就算佢在香港幾成功，但冇人夠膽帶佢去外地開騷，因為要冒非常大的風險，但丘先生當年就做了呢件事，自此子華走遍全世界！「肯第一次為你冒險嘅人，係好可貴嘅，多謝丘亞葵先生！」
Day 11 (16/7) 胡楓
黃子華說他在無綫拍劇嘅時候，有日「修哥」胡楓同佢講：「子華你唔好剩係做伊館(灣仔伊利沙伯體育館)，要做紅館！」又叮囑佢多做不同的新嘗試，雖然只係兩句說話，但令子華重新思考工作新方向，更鼓起勇氣在紅館舉行棟篤笑！
胡楓雖然年屆86歲高齡，但他永不言休，今年初就開咗兩場《胡楓86破晒紀錄演唱會2018》，真係唔到大家唔佩服，而黃子華就係尾場嘉賓之一，他出場時全場起哄，子華搞笑地攞咗一張櫈上台。「咁多人上來，有冇人攞過一張櫈畀修哥？」子華話只有修哥咁夠分量嘅前藝人至可以坐住開騷，但子華又補充話，修哥咁精靈，正是因為佢好少坐，佢又話以前在無綫拍劇都從未見過修哥坐。
Day 12 (17/7) 周潤發
這一夜發哥夫婦都有份睇騷，黃子華說很多市民都希望野生捕獲發哥，但他很榮幸，被發哥捕獲過兩次。係！係發哥捕獲子華！子華說1990年首次舉行6場血肉史棟篤笑，由於每晚只有不足300個座位，估計全港只有不足2,000人認識他，但萬料不到，周潤發係其中之一位觀眾。
舉行完第一次棟篤笑後，被發哥捕獲。「我有日同朋友喺中菜廳食飯時，離遠見到發哥，當時我覺得發哥應該唔識我，所以冇諗住上前打招呼。點知佢竟走過嚟同我握手，我當時就好似宮女見皇上一樣。」令子華相當受寵若驚。發哥在騷後接受訪問時表示，當時覺得子華有才氣，所以便上前跟他握手。
第一次被發哥捕獲，子華感到受寵若驚，到第二次被發哥捕獲是10年後，這次更是驚喜！當年子華在西貢一沙灘拍無綫劇《男親女愛》外景，場戲講子華跑步，撞啱發哥都喺度，發哥於是上前同劇組寒喧幾句，好親民。子華續說：「過咗一排TVB同事搵我，同我講：『喂，發哥有嘢畀你。』拆開，原來係一張相，仲喺相上寫上『Sure Win』。」呢張相就是當時發哥喺沙灘上影子華拍攝時跑步個樣，仲裱好送畀子華做禮物，發哥真係好有心！難怪子華趁著最後一次開騷，發哥也有到場，親口再次多謝佢。「好感動。估唔到喺我冇乜人識嘅時候，有人對我咁好。我很感謝發哥令我領略到地球真的有外星人，我還見了他兩次！」
子華是發哥很欣賞的演員，多次在訪問中指他是香港的代表，除了拍電影及棟篤笑，2016年更踏足舞台劇，與陳法拉演出舞台劇《前度》，可以說是能文能武。曾經有人提議發哥開棟篤笑，他就謙虛說：「棟篤笑？怎會比黃子華好笑？」
Day 14 (19/7) 陸永
子華多晚以來多謝咁多人，都係多謝一啲前輩人物或同輩朋友，但呢晚子華竟然開腔多謝一位棟篤笑後輩、農夫成員陸永！原來呢晚開騷前，陸永留低一個口訊畀子華，令子華大為感動。陸永稱由子華開騷起就唔睇報紙、唔睇facebook，要好似一張白紙咁嚟睇騷…… 因為呢個係陸永對子華的一份敬意！
Day 17 (22/7) 劉青雲
講到劉青雲呢位好兄弟，子華哽咽說最初開騷搵錢唔多，但在某次表演完畢後，同當晚有份睇騷嘅劉青雲等一行廿多人去高級日本料理慶功，廿幾人食日本料理唔平，作為主人家的子華雖然剩係認識當中3、4人，但都要埋單，就喺佢準備畀錢時，收銀員就話：「阿邊個幫你畀咗喇！」呢位「阿邊個」就係劉青雲。青雲對子華說：「我知道呢度好多人同你唔熟，我幫你搞掂喇！」令佢好感動，讚對方有大俠風範。
眾所周知，黃子華同劉青雲係超級老友，98年青雲與郭藹明結婚，子華更是兄弟團成員之一；工作上，二人多年來更是用同一位經理人，幫助處理工作事務，真係在公在私拍住上。
子華、青雲在《人生得意衰盡歡》首次合作，之後再喺電影《三個相愛的少年》、《終生大事》、《呆佬拜壽》合作，二人因而結成好友。
喺2013年嘅棟篤笑《洗燥》入面嘅短片《旋風腿》，更邀得劉青雲客串，片中青雲一句對白更成為網絡經典：「做人公關做得唔好，食屎㗎啦！」
子華神《金盆?口》感謝故事合輯
https://www.facebook.com/1606065709637071/videos/2145353555708281/