稻香$1鮑魚雞煲 5大叔淨食2雞煲埋單人均$15.8
各大餐廳都會不少推出各種優惠吸引食客，以達至宣傳效果。有網民於Facebook群組「耆英長者老人家搵外快 求職群」發文分享於旺角稻香酒樓的飲食優惠。他與4名朋友於上周五（8月5日）晚上結伴到酒樓聚會食飯，適逢酒樓推出晚飯及宵夜優惠，他們便叫了2個「$1鮮鮑魚雞煲」享用。他表示當時一行人還打算叫另一款、價值$28的氣鍋湯，惟落單時店員指該氣鍋湯已售罄，5人亦沒有再加點其他食物。
從事主親自上載的5人打卡照可見，他們一行人桌上除了2個$1鮑魚雞煲外，便只有餐具及熱茶。他表示最終與友人僅吃了2個雞煲便埋單離去，雞煲連晚市茶芥費用，賬單總數僅為$79，即人均只需$15.8。
網民反應兩極 大種乞衣 vs 跟足遊戲規則
5位大叔只食$79雞煲引起網民熱議，不少網民認為大叔們的行為像極大種乞衣，批評他們佔用酒樓飯枱晚飯，卻只吃了2個$1優惠雞煲，並無加購其他食品，做法小器又肉酸：「好肉酸囉，幾個大人咁食法，仲要話俾人知好叻咁」、「衰過乞衣」、「叫多兩個送幾支啤酒會死咩？」、「面皮有幾厚先做得出呢？」、「人哋打開門口做生意，燈油火蠟人工乜都係成本，你幾個大男人走去攞完人着數仲post晒大特寫出嚟，好似展示勝利姿態咁，過唔過意得去呀？」
但亦有網民認為酒樓打開門做生意，再加上條款中沒有限制他們的做法，有跟足遊戲規則，因此一行人只食$79蚊完全沒有問題：「跟足酒樓規矩都要比人話酒樓set咁既優惠出嚟，無人迫佢做㗎喎」、「明買明賣，唔明有咩好鬧」 、「鐘意點叫咪點叫，你開門就預咗㗎啦」、「人哋搞咗20幾年活動，實知有無賺，飲食最重要就係人流，無客蝕租人工材料成本」、「豐儉由人，一方願買，一方願賣，有乜問題」、「推廣政策不是什麼新鮮事，推得出嚟就預咗有呢啲客」。
