天氣熱小強湧現　曱甴品種你識幾多？點解識飛？一文認清習性＋杜絕方法

長鬚曱甴數量大增　蟲害專家：反應好敏感　一舉手已經半跑半跳地走

夏天到來，蟑螂出現的次數亦隨之增加，近日有網民在網上分享指家中蟑螂問題嚴重，在晚上刷牙時發現有蟑螂爬上牙刷，令他驚恐不已。要杜絕蟑螂，梁廣源指，大家首要先分清品種及其習性，以家居蟑螂而言，以往較常出現的是德國蟑螂，但近年反而長鬚蟑螂的數量出現得較頻密，由於兩者特性及外觀均有所不同，下手前要看清楚：「近來我接到很多家居個案，發現德國蟑螂數量無以前咁多，反而係長鬚蟑螂增加，主要原因係長鬚曱甴好敏感，人一舉手佢已經察覺到仲走得好快，好難捉到佢；相反德國蟑螂行動較慢，容易捉到殺死，數量所以無以前咁多。」

網購送貨成曱甴來源　最愛食紙皮箱

梁指，家居蟑螂常於晚上出動，主要在廚房及洗手間的隙縫出現，即使平日保持家居清潔但仍有曱甴出沒，主要原因是忽略了細微位置：「油漬味其實對曱甴嚟講相當吸引，因為牆身本身都會吸味但好少人抹屋會抹埋幅牆，當曱甴聞到油溢味就會爬入屋，所以無論係微波爐底、門邊、牆身其實都要清潔。」另外，網購亦是另一個蟑螂來源，由於蟑螂特別喜愛吃紙皮箱，若家中不即時扔掉這些包裝盒便會成為蟑螂溫床，因此梁建議大家勿在家中囤積紙箱。

殺蟑螂4大謬誤　用煙霧彈原來超錯

1.不建議用殺蟲水或煙霧彈

梁指，殺蟲水及煙霧彈的威力不足以殺死蟑螂，反而令牠們「匿得更埋」或有機會令牠們有抗體，「你用殺蟲水或者煙霧彈唔係對正佢嚟噴，只係噴到佢周圍環境，係未足以令曱甴接觸到致死份量，最多焗咗佢出嚟。加上曱甴蛋本身亦不會被殺蟲水或者煙霧彈殺死，過一段時間牠們同樣會孵化出嚟，正正就係大家成日諗點解殺極都仲有。」

2.曱甴屋氣味不足以做餌

由於蟑螂主要靠氣味覓食，曱甴屋原意是利用氣味吸引蟑螂進內食有毒的餌引，但一般曱甴屋的氣味維持不到太長時間，「啲味散開咗，引得佢出嚟但都唔會引到佢行入曱甴屋，所以都無用。」

3.用拖鞋拍死蟑螂會引起致敏源

坊間有傳用拖鞋拍死蟑螂會令屋內留下氣味，吸引其他蟑螂入屋，梁指這做法及說法均不正確。「用拖鞋拍死曱甴最大弊處係會令汁液飛出，曱甴嘅汁液有好多寄生物，接觸到會引起過敏。至於有傳汁液吸引曱甴，這說法並不成立，只屬謠傳。」

4.蟑螂識飛因懷孕　代表有蟑螂竇？

坊間有傳會飛的蟑螂皆因懷孕，惟梁指說法無根據。「你見到會飛嘅通常都係美國曱甴，你留意吓佢只低飛，唔關有無BB事，而係曱甴嘅翅膀本身都唔係用嚟飛，係品種問題。」

最佳杜絕蟑螂方法：用死曱甴做毒餌

梁指，最簡單的捉蟑螂方法是用紙巾包好然後掉進廁所沖走，或是用曱甴Gel。「曱甴Gel最好係因為曱甴食咗之後會有毒素殘留喺體內，當同伴嗅到屍體味就會食，食完咪又中毒死，呢個連帶關係係最有效。」梁亦提到自己在家中有「死曱甴」時會叫工人掃到一旁但不會清走，用作做餌引以毒死其他蟑螂，改善家居蟑螂問題。