撰文：Yung
01 | 手打紫薯心形多士！Bless Juice Bar
舖頭位於歐陸氣息重嘅崗頂前地，Bless Juice Bar主打配以時令食材製作嘅press juice（冷壓果汁）。除咗果汁，店內亦有提供冰滴咖啡（MOP45，約港幣$44）、適合素食者飲用嘅蜂蜜豆乳抹茶（MOP39，約港幣$38）以及最新推出嘅自選果昔等各款特色飲品！梗有一款啱你心水。除咗飲品，亦有輕小食可以填肚！當中最為推介紫薯流心芝士多士（MOP29，約港幣$28）。
紫薯今年大熱，唔少食店都以紫薯製作食材作招徠。但要喺芸芸紫薯食物中搵到出色而唔係只得人工甜味嘅絕非易事。呢間紫薯流心芝士多士嘅紫薯係老闆手打，所以唔會有顆粒喺入面，口感好滑。甜甜紫薯同芝士出奇地夾，唔會予人鹹甜不分感覺。除咗紫薯多士，紫薯迷可以飲埋紫薯抹茶果昔，被滿滿嘅紫薯包圍！
特色咖啡
Bless Juice Bar
營業時間：星期一至五10:00am-7:00pm，星期六、日11:00am-6:00pm
地址： 澳門崗頂前地1號B
02 | 超滋潤！椰青水 x BB 雞煲
椰青飲就飲得多，但有冇諗過椰青水同椰青肉可以用嚟食雞煲？破格火鍋店灃收火鍋裝潢特別有格調，打卡打邊爐都一流，作為 澳門美食， 同一般香港大路火鍋店嘅平實風截然不同。除咗裝修特別，湯底都有特色。
其中必食椰青礦泉水BB雞煲（MOP168，約港幣$163），用椰青水、椰青、礦泉水煮BB雞。湯底清甜，可以當普通湯飲潤肺，飲完當堂覺得自己皮膚好咗。至於雞肉，店舖採用 6 個月大 BB 雞，無論肉定皮都好滑。而且雞肉好入味，一入口就有淡淡椰青味，唔需要再額外點豉油食。同一般雞煲食法一樣，食晒所有雞肉，侍應會加雞湯畀食客打邊爐。呢度嘅雞湯係冇味精嘅！
除咗BB雞煲，雞煲蟹（MOP398，約港幣$386）亦值得一試！煲入面有1隻BB雞、2隻超多膏頂角膏蟹，配以辣味醬汁，啱晒鍾意濃味嘅朋友！
灃收火鍋
營業時間：6:00pm-3:00am
地址：筷子基俾若翰街349號H座地下
03 | 女生大愛！JW Marriott X 卡夫卡聖誕主題 tea set
澳門JW酒店今個聖誕同當地人氣法式甜品小店卡夫卡合作，改良卡夫卡招牌甜品配上聖誕造型，推出甜點下午茶（MOP258，約港幣$250）。每款甜品外形都精緻，別出心裁，用嚟呃like一流，剩係影相都值回票價。
唔好以為個tea set只係得個樣靚，款款都好有實力，味道一流！例如聖誕樹造型「京都之森」有濃濃綠茶味，又唔會太甜。至於以品牌「泰姬陵」甜點作製作藍本嘅「永恆雪花」，今次配上新加坡高價茶葉品牌Tea WG 1837 黑茶，將甜品提升到更高層次。
JW酒店「大堂酒廊」
供應期間：即日至2017年1月8日
地址：澳門路氹城澳門銀河綜合度假城，JW酒店「大堂酒廊」
04 | 新口味芝士撻！HOLY CHEESE
早排喺香港好hit芝士撻，嚟到澳門都有得食！蛋糕麵包店Holy Cheese以芝士製作各款麵包，當中最出名係芝士撻，有抹茶和芝士原味兩款口味（MOP19.9/1個，約港幣$19）。金黃色香脆牛油皮配上流心北海道芝士同抹茶，味道濃厚。唔止食物賣相，就連包裝袋都好精美，細節做到一絲不苟。
Holy Cheese
營業時間：12:00nn-8:00pm
地址：氹仔舊城區廣東大馬路116A-142F南新花園第六座地下G舖
前往澳門有哪些交通方法？
可以選擇金巴或港澳快線或金光飛航及噴射飛航。到達澳門後，則可坐輕軌氹仔線，途經碼頭、機場、多間酒店及主要旅遊區，澳門自由行時交通更加方便！而澳門酒店由設計到設施都非常出色。
有什麼澳門好去處？
澳門有不少新設施及全新好去處，其中澳門賭場、必去景點及食買玩介紹，玩轉澳門！然而，澳門美食眾多，除了豬扒包，也可到各大酒店享用自助餐及打卡必去的陽台Cafe當半日文青。
