【日本御守知識】好多旅行者到日本旅遊時，都會到寺院或神社參拜，然後買番幾個御守當做護身符，或送畀親朋好友當做手信。日本人對神明相當敬重，而御守之中亦有「小神明」寄宿，即使係外地人，都有一定嘅禮儀及做法需要遵守㗎！
撰文：C ｜圖片：各大日本神社
唔清楚神明們生前關係如何嘅話，咁就要避免將唔同御守擺埋一齊喇！
日本御守知識
1｜不能買複數御守？
大家有冇聽過一個說法，話將喺唔同神社買入嘅御守放埋一齊，神明會互相嫉妒或嗌交，所以要避免將唔同御守放埋一齊？
其實唔需要擔心神明們會嗌交，因為道行高嘅神明們唔會因為咁而扼殺彼此嘅靈力。不過要注意嘅係，神明都會有配合度嘅問題，應要避免將關係唔好嘅兩名神明嘅御守放埋一齊。
覺得買完御守就可以心想事成嘅，其實係對神明唔禮貌嘅諗法！
2｜態度：御守內有神明寄宿
「御守」其實亦即細小嘅神明，所以佩戴時，應保持敬重嘅態度。覺得只係攞住就會「轉運喇」、「心想事成」嘅思考方式係對神明不禮貌，「因為有『御守』嘅保佑，目前狀況先有向好嘅方面改善」才是正確嘅態度。3｜御守正確佩戴方法
關於戀愛/結緣御守
因為無法預知何時有戀情萌生或結緣，所以應隨身攜帶並藏好。可放入車票夾或手袋內袋。另外，如果係求「相遇」，可放入象徵外出嘅行事曆之中。關於學業/考試御守
可與用於練習listening的音樂播放器放在一起，又或放到筆盒之中也可。考試開始前，可輕輕用雙手握著御守，全身放鬆並祈求合格/好成績。關於家庭/健康御守
家庭、健康或工作用等御守，可綁到每日隨身攜帶的手袋上，而長壽御守等，則可綁到手推車或柺杖上。 求子或安產御守則可放到每日手持的小袋子中，又或放到腹帶的內袋中，並每日誠心祈願。關於除厄御守
由於係保佑遠離疾病，每日健康平安嘅御守，因此可放入外套內袋，或每日隨身攜帶嘅手袋之中。推薦厄年嘅朋友購入一個除厄御守！其他御守
福錢：祈求積聚金錢，可放於銀包或金庫中，便有利積聚財富。銀包、金庫及存摺保管的地方都適宜與御守同放。
御神札：祈求福運到來嘅御守，應朝向東或南方擺放，如沒有放置神壇時，可放於北側的柱子或牆壁上，比視線高度高的位置，並每日禮拜。御神札有「家庭圓滿」、「夫婦圓滿」、「家內安全」、「商賣繁盛」、「地主神社」等祈求各種願望嘅款式。
御神札應安放於家中，面朝東/南方比視線水平高嘅位置。
4｜御守有限期
唔少朋友都有過「因為唔知點掉先好，所以一直都袋住同一個御守」嘅煩惱，但吸收咗周圍霉氣嘅御守力量，並不會永遠持續有效力。簇新亮麗嘅御守神力較強，而因為長期貼身攜帶，御守慢慢會變舊或弄污，而令神力變弱。 基本上，祈求「家內安全」、「交通安全」、「商賣繁盛」嘅御守，可視1年為有效期，並將舊御守返還到神社。
但「結緣」、「戀愛成就」、「受驗必勝」（考試）、「安產祈願」等有著明顯「想實現呢個願望」嘅御守，則可於目標/目的達到之時，視為御守嘅神力期限。以感激之心送回舊御守，並買入新的御守。
5｜如何處理舊御守
返還舊御守時，要先分清係喺神社買嘅，定係喺寺廟買，神社買嘅就返還神社，寺廟買嘅就返還寺廟，唔好搞錯。 最好可以將舊御守直接返還到買入嘅地方，但如果因各種事情無法還到同一地方嘅，則可返還到附近嘅神社/寺廟。每年1月嘅初詣時期，大部分神社/寺廟都會設有收集想焚燒嘅御守/祭品嘅，稱為「古札納め箱」嘅地方。返還時，可投放相當於御守一半價錢（500～1,000円）左右嘅賽錢以表心意。
除咗正月初詣時期，唔少規模較大或較出名嘅神社，都設有專門收集舊御守或木札，亦樂意回收從其他神社求得嘅御守，不過達摩、熊手就不能收取。
圖為淺草寺所設嘅，用於收集舊御守嘅專用地方，任何時候都接受返還舊御守。