傳聞1 ： $699五天團咁著數？旅行社賣大包？
領隊答你：「就算人頭價得 $700 的旅行團，旅行社最終都可賺每人 $2,000 ！」
唔好以為一定要團友購物先可以有佣金賺，原來只要遊客行入店舖，導遊就可賺到每人 $100 左右。另外，再加埋「自費活動」，旅行社分分鐘可以賺多過 $699！
傳聞2 ：導遊領隊要帶錢返工？
導遊答你：「未見官先打八十大阪！」－未出發先要交定導遊費畀公司！
「導遊費」是行程結束後才收取，但早在出發前一兩天已經要預先交畀公司。而外地導遊甚至要早早為每個旅客多付司機小費等雜費，他們通常只可靠自資行程或店舖購物，先有機會回本！試問咁點可以唔「chur」到盡呢？
傳聞3 ： 旅行社推銷陷阱多？有咩要注意？
導遊答你：「邊有一個地方四季都啱玩吖！」
報名前要留意下某些國家或路線的季節性，例如東非的動物大遷徙 6 月至 9 月最適合，如果想新年去？旅行社當然唔會 say no 啦！通常會同你講呢段時間係比較少人去，但較易追到動物，又可以舒服啲，而且價錢又低⋯⋯ 聽到呢度，自己就要醒水喇！
傳聞4 ： 導遊有好多酒店奇遇？間間酒店都有鬼？
導遊答你：「好多都係編出嚟！」
多數酒店的鬼古都係呃遊客嘅！例如唔好入住酒店走廊盡頭的「尾房」、「頭房」，因為靈體據說會在走廊頭尾徘徊⋯⋯有領隊就話有行內人試過利用呢個傳聞，令到四位少女住客為避住尾房而只住一間房。但都有領隊試過協助團友開房門時，感到一陣風吹過，而更心寒的，竟然是團友手指著空氣，話個仔叫佢唔好入住呢間房，後來先發現，嗰位團友應該是帶住養緊的「鬼仔」一齊去旅行，至於團費⋯⋯當然冇包埋個「仔」啦！
傳聞5 ： 帶團入酒店住時係咪會有「特別準備」？
領隊答你：「『敲房門』、『拜四角』係有嘅！」
大家唔使緊張，因為所謂「敲房門」、「拜四角」係另有意思嘅！「敲房門」只不過是要確保房裡面是沒有人的；而「拜四角」其實只是檢查一下上一位住客或自己離開時有否遺漏東西而已。
傳聞6 ：會同團友一齊去玩、飲酒，甚至召妓？
領隊答你：「會的！但收唔收錢就視乎導遊啦！」
通常導遊覺得自己有份玩，所以都唔會要求另外收錢。而召妓呢？有導遊表示，試過帶親子團，而部分想另外玩的團友，都會喺自由時間（通常回酒店後）同親友講：「同導遊領隊到附近行下、買下嘢！」之後就一齊出發，而第二日都會若無其事咁繼續行程嘅。
