FLIGHT PATTERN 種類
LONG-HAUL
其實根據航空公司嘅內部守則，飛行時間六個鐘以上已經算係long-haul。不過一般同事約定俗成嘅認知就係美加/歐洲/非洲嘅航班先叫長途。因為呢啲航點同香港有大於六小時嘅時差，飛行時間十小時以上，所以通常飛完呢啲航點，我哋都會有最少三日嘅連假去休息。
Long-haul嘅特色在於一定會有時間喺outport逗留，因此，通常都會係重要嘅allowance來源（當然都要視乎航點嘅物價指數，南非航班同蘇黎世航班逗留同樣咁長時間，但係allowance可以少成近乎2,500港紙）。
SHORT-HAUL
01 | TURNAROUND
即係即日來回做兩程機嘅duty。通常大家去旅行最鍾意早機去晚機返，事實上，好多同事就唔係太鍾意，因為通常要做足全日原機返嚟，冇得喺outport賺allowance，又冇outport stay。
02 | LAYOVER/OVERNIGHT
同turnaround相對嘅就係layover。係外站逗留超過八小時，雖然聽落好似好多，但係航空公司通常都會安排到夜機到，第二朝一早就要起程返香港。大部分同事都係當去酒店過一晚夜，賺少少allowance。
03 | SPLIT DUTY
同樣都係去酒店瞓一瞓，split duty嘅特色係休息時間只需要最少3個鐘就得。咩話！一晚只係畀人瞓3個鐘？聽落去好似非常之唔人道，但係由於只有service簡單嘅超超超短機馬尼拉同台北先會有呢種pattern，而且喺酒店休息期間都會當你返緊工，計ground duty咁出糧，所以呢類型pattern都深得一部分同事嘅垂青。有啲女同事會當呢個短短嘅stay係inflight rest，連妝都唔落，爭取休息時間！
04 | REDEYE
紅眼班即係要捱夜嘅機，不過通常用嚟形容redeye嘅，都係講redeye turnaround。因為上班時間大概係下晝6點，直至第二朝清晨5、6點左右先放工，會嚴重擾亂生理時鐘，因此普遍唔受同事歡迎。
ROSTER 種類
HIGH DENSITY (high釘）
有一種空姐空少，雖然係飛嚟飛去，但係永遠唔會喺外站逗留，去到最遠就只係人哋個機場，呢一種同事就係專飛turnaround嘅 high density同事。
由於好多同事做咗人夫人妻、人父人母，或者上堂學緊嘢，又或者需要多啲時間留喺香港處理其他事情，又唔想轉「返落地」，就會選擇飛high density。當然都有一啲同事係純粹唔想成日有jetlag或者捱夜，為身體著想而轉high釘。
SCHEME
如果你早幾年問空姐空少「飛開邊條線」，佢未必會答到你。但係近年航空公司揀選咗某幾個澳紐地區畀同事們選擇「只飛一個port」，而換來嘅代價係呢啲特定航班嘅組員逗留時間變成只得短短廿四小時，呢種roster就叫做「scheme roster」。時至今日，唔少同事對此安排都仲係爭議不斷。
HIGH HOURS
即係申請要返好多工，請求公司用盡自己。由於航空公司若干年前開始只請時薪制嘅空姐空少，近十幾年入職嘅同事都係多勞多得。
特別的更，給特別的你
STANDBY
隨時候命。相信唔少人都聽過，空姐空少通常最唔鍾意就係standby，因為唔知要唔要飛同埋唔知要飛去邊，又唔可以亂約人，驚會臨時要放飛機，嗰種等候發落嘅心情真係令人特別忐忑，同事們尤其怕聖誕新年嗰排要standby。
Standby係輪迴，吖！唔係，輪流制先啱，通常隔三、四個月就要standby一次。但係申請咗上面特別種類roster嘅同事就會逃脫咗呢個輪迴，佢哋有屬於自己嘅standby模式。
DUTY TRAVEL
唔知大家有冇見過有啲「客人」好早已經上機坐定定，但係當就嚟落機嗰時，會突然間換番套制服咁呢？唔使擔心，佢哋唔係潛伏喺乘客入面做無間道，佢哋只係公司需要額外人手而特別運送佢哋去外站，有可能喺嗰邊有同事病咗或者其他原因。由於同事係做「客」嘅關係，所以出糧都只會計一半。有一種duty travel係運送一架完全冇客人嘅機去某個航點，呢種我哋又會叫做「ferry flight」。
BAR DUTY
某一啲航班如果係預計會有好多大豪客買免稅商品嘅話，公司會特別安排一個額外嘅人手上機，剩係主責免稅品銷售服務。