空少親歷4個被侮辱的瞬間……
個案1 | 慘被大媽圍
試過有一群大媽一上到機就興高采烈,一個二個攞住部手機四圍影。旅行時想記錄每個開心時刻本來唔係咩大問題,但係影得太忘形時阻塞機艙走道,阻礙到其他人登機,我哋就點都要做返啲嘢。動身上前想勸佢哋坐好,面前就十部八部手機圍住,被人360度全方位超高清咁影影影。一瞬間被十幾個大媽「輪」咗我嘅肖像權,真係嚇到呆咗。好彩有同事幫手呼喊叫停,先控制到嗰時混亂嘅場面。
個案2 | 拍!拍!拍
話說韓國大媽性子都比較急,加上同我哋又言語不通,當佢哋有事想搵我哋嗰時,就好鍾意直接用身體碰撞的方式換取注意。
不論你係男定女,佢哋一想搵你時,隨手就會拍落去,大髀呀臀部呀呢類比較私人嘅部位,佢哋都會毫不猶豫咁拍落去。起初唔習慣時,真係會覺得有啲受辱。我本身都唔喜歡被陌生人掂,仲要一嚟就被人拍屁股咁越級挑戰?最慘係你好聲好氣用英文向佢哋解釋唔可以拍你嗰時,佢哋又會擺出一副似懂非懂的表情,轉過頭又開始拍過。
個案3 | 你哋只係奴婢嚟咋!
一般空姐空少都唔喜歡乘客將食完嘅餐盤放喺地下,因為咁樣空服員收餐盤時,就要跪喺乘客面前執拾,感覺唔太舒服。好多時候我哋都會禮貌性咁要求乘客遞一遞地上個餐盤畀我哋,其中十居其九都會好樂意合作。但就試過有一次遇到個中年男人,唔肯合作之餘,仲要出言不遜,佢話:「你哋唔好喺度扮晒矜貴呀!換著係古時,你哋只不過係奴同埋婢咋!」
個案4 | 拍手叫狗
試過有一次有個乘客企起身,想呼喚不遠處嘅同事,正常情況下,乘客會選擇用服務鈴或者簡單嘅呼喊或揮手示意。偏偏呢位乘客用咗一種只適合用於寵物嘅方法,佢先拍兩下手,然後張開兩手做出示意「過嚟啦」的身體動作。上面提到會有人當空服員係奴婢,似乎都有人當空服員根本唔係人。