地勤代理匿名用千字文爆Seed回應「分開坐」一事　網民：講得好啱

有地勤代理匿名鬧爆：官網一早寫明

明知自己撘廉航就唔好要求有服務，唔係奉旨可以一齊坐，亦都唔好當一齊坐係老奉，一家大細，有老有嫩，一齊開開心心去旅行，點解唔畀多嗰幾十蚊買個位？

我哋只係地勤代理，我都係跟航空公司政策做嘢，人哋政策寫到明「如果您沒有預先購買座位，我們將會在閣下辦理登機手續時，為您隨機安排座位。」官網上面寫得好清楚，你哋自己唔睇就唔好成日當我哋同你講揀位要畀錢就話人哋都冇寫。我哋能夠做嘅只係安排到小朋友同一個大人一齊坐，其他真係隨機，所以你嚟到發我哋爛渣都係無補於事，只會得得你自己樣衰，同埋唔好成日以為投訴就可以大到我哋，人哋政策寫得咁清楚，我哋幫香港快運收錢，對佢哋嚟講會有利益，你覺得佢哋仲會唔會受理你哋呢種投訴？所以其實我哋都唔會驚。

亦都唔好同我講點解上次得今次唔得，上次係你好彩，唔代表今次都係。同埋有啲人一家人去旅行分開幾個Booking，電腦更加難隨機分到一齊坐。

另外地勤亦提醒乘客要提早1個鐘Check in

順便X埋遲到Late Show，官網又係寫得好清楚，起飛前一個鐘頭關閉櫃檯，唔好又係同我講官網冇寫，人哋國泰40分鐘，人哋還人哋我哋還我哋。

都咁大個人啦，唔該預鬆少少時間，你遲咗唔代表我哋一定要收返你，因為仲有其他部門要做嘢要計數，你喺度死囈爛囈都冇用

所以總結唔該你哋唔好再為難我哋，我哋都係跟規矩做嘢，你哋班人就係咁貪心，以為一次得就等於次次都得好似老奉咁，一家人開開心心去旅行就唔好慳嗰少少錢啦。

港女投訴HK Express 一家大細登機竟要分開坐　加錢都唔得　網民反撐：支持揸正嚟做

今日一名港女於FB群組「HK Express 香港快運及旅行資訊關注組」上訴苦，指自己同行有2位近70歲老人家，1位5歲小朋友，到機場Check in 時，發現地勤人員竟然沒有安排他們坐在一起，座位分散於機尾。於是她再請地勤安排座位，指早前12月可以請地勤安排，但現時調位就要强制加錢，對此感到不忿。

港女：搭咗好多年HK Express 都未試過咁樣

港女指以往試過Online Check in，但都無得一齊坐，當時在地勤幫助下，可以有連位。因為知道今次同行有老有嫩，所以提早3個鐘頭到機場 Check in，希望地勤會安排，卻發現座位分散於機尾。地勤指要轉位就强制付費，按照當時情況，付費亦要分散坐。港女直言：「搭咗好多年HK Express 都未試過咁樣」。

網民反撐HK Express做得好：50蚊劃個位有咁貴咩?

網民反撐HK Express做得好指：「明知有老人家，點解唔畀錢揀位」、「上手做人情畀佢就以為奉旨，跟住就淡淡定」、「花幾千買機票。50蚊劃個位真係咁貴咩」、「全力支持hkexpress揸正嚟做」、「幾時開始飛機有關愛座」、「無畀錢有咁近嘅安排我覺得已經唔錯，可能B位無人坐呢」、「你都要尊重返畀咗錢買呢啲服務嘅客人㗎」、「40a、40b已連，其實坐附近已好過隔幾行」等。