赴日兩個月零工作自嘲「待業坤」
吳業坤(坤哥)去年11月趁住未超齡,專程飛到日本進行working holiday,至今已逗留超過兩個幾月。坤哥日前接受鄭裕玲(Do姐)電台節目訪問,自爆兩個月嚟都係抱住「佛系」心態搵工,佢話:「其實日日瞓到自然醒,瞓醒都10點後,做運動醒下個人,之後就出去食飯,食飽睇下日文書,好快到夜晚。開頭都諗住搵工,但係唔知幾時返香港,所以算啦!變咗no working嘅working holiday!」佢仲笑自己目前叫「待業坤」,坤哥陣毒男味出晒嚟。
坤哥:「覺得自己好廢!」
訪問中,坤哥話喺日本因為太得閒,毒到匿埋上網學捲脷,學足一星期。之後,Do姐好心提議佢拍下旅行片擺上網同大家分享,點知坤哥不離毒男本色話:「未體驗到啲乜,冇咩衝擊,揸住部相機,好似硬要拍啲嘢出嚟,算啦!真係遇到特別嘅先。」訪問到最後,Do姐終於忍唔住問佢唔悶咩?坤哥先話:「有啲思鄉,原來兩個月唔工作,都有諗覺得自己好似好廢!」又自嘲自己來到日本只帶了幾萬元,覺得「應該夠用」。
Ig晒無綫十年金牌慘被網民留言:浪費青春
30歲的吳業坤日前獲無綫頒發十年金牌,出席《無綫長期服務暨傑出員工頒獎禮》還包括有獲頒廿年金牌的阿叻陳百祥,由行政總裁李寶安親自頒授金牌,各高層都有出席,場面看來相當盛大。之後,坤哥在社交網威威晒金牌,並留言考大家金牌的意義,獲得過千留言。不過,大部分網民都笑他浪費十年青春,又重提他在台慶被安排做人肉棋子之大辱,紛紛留言叫吳業坤離巢向外闖,更有網民指,這十年金牌連狗牌都不如。
吳業坤被勸參加《造星》
吳業坤獲得十年金牌,即在社交平台騷畀大家睇,並留言:「考下大家知唔知塊金牌有乜意義?」獲過千多個留言,不過九成九都唔係戥坤哥高興,而是嘲笑他把十年青春就此浪費,紛紛叫坤哥離巢外闖,更提議他過檔近來成為無綫勁敵的ViuTV,又叫他下次參加《全民造星4》。
坤哥被重提台慶扮棋之辱
網民重提吳業坤六年前在台慶扮棋一事,指他在大台無甚發展,只會繼續被忽視。更有網民恥笑他:「有冇諗過發展棋藝?下次做中國象棋定圍棋?」同時亦有網民指,無綫十年金牌連狗牌都不如,網民即留言:「狗牌都有名,佢(坤哥)嗰塊冇㗎!」吳業坤晒十年金牌呃like不成,反被網民派嬲同瘋狂恥笑,被圍笑圍插的坤哥,未有回覆,繼續沉默。
為追歌手夢入行卻拍劇多過唱歌
回看一心想當歌手的吳業坤,10年參加《超級巨聲2》獲得第五名而入行。16年頭的頒獎禮是其豐收年,在《勁歌》奪得「最受歡迎新人金獎」,並憑〈原來她不夠愛我〉得勁歌金曲獎,上台演出時泣不成聲,成為經典之一。同年在商台《叱咤頒獎禮》一口氣摘下三個大獎,包括「生力軍金獎」、「我最喜愛的男歌手」和憑〈原來她不夠愛我〉奪得「我最喜愛的歌曲」大獎,成為頒獎禮大贏家,上台領取時,不但喊到扯蝦,身穿直條西褲的坤哥,下體現激凸,被指興奮過度,一度成為佳話及其代表作。
16年以出道年資最短僅十六個月在紅館開個唱的坤哥,開完個唱後,似乎無以為繼,在無綫拍劇多過唱歌。過去一年都是以拍劇為主,月前拍畢新劇《異搜記》,間中上《流行經典50年》翻唱老歌,而非宣傳新歌,難怪被網民指浪費十年青春。