（編按：由於島上配套不勝負荷，自從去年10月刊出「迫爆離島 | 遊客過多令 長洲 不勝負荷！」一文後，GOtrip編輯部已冇推廣長洲旅遊的文章，可惜仍無法阻止每逢假日迫爆人潮的場面，加上遊人依舊垃圾隨處掉，令「淪陷」景象一再出現。有讀者向我們來稿，力數一窩蜂攻陷長洲的荒謬⋯⋯）－－大家明唔明長洲迫爆之苦？以後喺食物名前加「長洲」兩個字都夠發達，明明只係值2蚊嘅嘢，放落長洲賣20蚊都大把人買，喂大佬，香港都買到啦，隨時仲平啲添！
香港周圍都食到，點解要入長洲食？
人人都話食咩芒果糯米糍、大魚蛋。
我想講，你以為呢啲嘢長洲種出嚟？唔好傻啦，全部都係香港運入嚟，果欄都買到！你入嚟買，蝕船費之餘，仲要畀埋食物啲運費呀。
周街單車友，長洲人行都冇得行！
仲有，長洲係冇單車徑，唔熟悉踩單車唔好入嚟踩，成日都見到你班遊客撞到人sorry都冇聲，仲可以聲大夾惡屌番人轉頭。長洲人踩單車嘅經驗閒閒哋都十幾年，你冇咁嘅技術就唔好玩。另外，踩三輪車載人係違法呀（唔好迫到人要影你相報警）！就算你單人踩都唔緊要，我同你講，咪撚踩入橫街窄巷，你隨時搞到成條街行唔到。
最後，嚟都唔緊要，我阻止唔到你，但係唔該自律，畀番啲香港人應有嘅公民質素嚟！ （例： 垃圾桶滿晒，自己搵個袋又好咩都好，自己攞住先，唔好扔地下/夾硬塞落垃圾桶/放落人哋單車度！）Thx
