One Piece 中環 出沒注意！熱辣辣熱辣辣…好熱好熱！怕熱的朋友，不妨參加以下活動消消暑！『 海賊王・ 夏日激航狂歡世界 One Piece Carnival』將於 2016 年 7 月 8 日至 8 月 7 日在中環海濱活動空間舉行，記者 Mandy 受邀去率先試玩，但去到現場大失所望！究竟發生咩事？
失望位01：說好的草帽海盜團烈陽號呢？
官網指今次會展出日本境外最大型搭建版烈陽號，但記者去到現場完全不見其蹤影！現場只見三個大型吹氣設施，說好的戶外障礙賽都只係得一樣，失望！
失望位02：又話可以試玩？
一場去到，點都要有啲位畀大家試玩吓，PR原本安排大家可以試玩大滑梯，但當時仲有其實藝員在場，當然畀佢哋玩先啦！玩完一次又一次之後，應該到等到花兒也謝了嘅傳媒試玩啦掛，點知負責吹氣滑梯嘅工程人員黑晒面，話「要玩又唔早講，宜家拆到一半先話玩，冇啦！」一眾記者只可以呆企，PR又只識企埋一邊唔出聲，失望！
失望位03：路飛主題設施，路飛呢？
結果今日記者只係玩到一樣設施，就係「路飛橡皮槍彈拳頭陣」，不過記者左睇右睇都唔見有路飛，有關單位話正式開放時會有返啲角色喺設施度，大家聽住先啦！而所謂嘅「橡皮槍彈拳頭陣」亦都一啲都唔刺激，失望！
記者 Mandy 無得試玩後感：
場內混亂，只係得三舊吹氣設施放喺度，官網話有嘅設施、場景大部分都未見，安排試玩又最後冇得玩，影相位又冇，完全失望！
雖然話7月8日先開幕，但既然邀請得傳媒，都係想為件事做宣傳啫，宜家嘅安排令記者冇得親自體驗有幾好玩之餘，連入面嘅場景都話唔到畀讀者知，叫人點介推介值唔值得去呢？
『 海賊王・夏日激航狂歡世界 ONE PIECE CARNIVAL 』
地址：中環海濱活動空間（顯示地圖）
舉辦日期：2016 年 7 月 8 日至 8 月 7 日
門票：基本入場費：$50
平日全日通: $400 | 週六日全日通: $500 (12 歲或以下兒童免費進場)；
VIP套票$7,000 (包含 31 款不同款式門票及 31 條全日通手帶換領券)