我叫Alan，今年28歲，女朋友25歲，我同佢拍咗兩年幾拖，佢畢業後出嚟做咗兩年嘢。
「窮遊」 － 唯一體驗當地文化的方式？
女朋友自從兩年前同幾個同學去完歐洲畢業旅行之後，就愛上咗去旅行。 但佢只鍾意窮遊，佢話去旅行一定要窮遊先可以體驗到當地嘅文化喎……
「嗱，你跟團去旅行根本就只能夠走馬看花，一個景點接一個景點，影完相打完卡就走人，成個過程路又唔使搵，又唔使點去同當地人接觸，飯來張口，咁樣根本上就失去咗去旅行嘅意義。 況且跟團好貴，又要被人規限住行程，呢餐食乜，嗰餐食物，咁樣同被人監管有咩分別？」
案例一：老人家同遊 堅持自由行更辛苦
女朋友係咁樣睇跟團去旅行，所以我從來都冇打算同佢跟團，但我發覺有陣時佢都比較過分。 例如上年佢同屋企人去台灣，當時佢個七十幾歲嘅阿爺都有去，佢阿爺最想去日月潭，須知道佢阿爺行動都唔算得上太方便嘅人，行一陣就會攰，但佢都要堅持成家人自由行去，結果搞到佢阿爺去完返嚟話去旅行好辛苦，日日行去趕車等車搞到對腳晚晚都痛到瞓唔到。
為咗趕車又搞到食飯唔準時而令到自己胃痛發作， 但女朋友就反駁話如果跟團嘅話，咪又係一個景點趕另一個景點，到時咪一樣攰一樣食飯唔準時……其實我覺得為老人家安排一個飯來張口嘅行程，又有何不妥呢？
案例二：為求平飛平住 失去舒適旅程
記得第一次同佢去旅行，當時我話所有費用我畀晒，佢就話唔想我用太多錢，所以旅行嘅行程就由佢決定，我問佢即係點？佢話由佢去安排機票酒店，保證超值。搞掂機票酒店後，先大家一齊研究行程。 聽到佢咁講，我心中暗地欣喜自己可以搵到個知慳識儉嘅好女朋友。
話去旅行係兩年前嘅事，女朋友話等佢訂到機票酒店嘅時候就通知我請假，我問佢即係幾時，佢答我話未知，要等airline做優惠先得，原來佢係想捕廉航嘅機票。 本身我哋想去台灣，當時如果買package， 每人2,500蚊已經包晒早去晚返嘅機票，再加上三晚四星級酒店連早餐。 但女朋友話如果坐廉航再加上住民宿就會平好多，所以我就聽佢意見，畀佢話事。
決定咗地點，女朋友就鎖定某啲廉航分司，每當知道會做優惠嘅時候，我哋就會準時夜晚12點去捕超值機票，但我發覺我哋想去嘅台北，呢間廉航根本就冇得飛。 女朋友話飛台北就算做優惠，連稅都要過千蚊一張機票，不如改去台中啦，嗰邊唔似得台北咁樣咁繁忙，我哋可以兩個人安安靜靜咁樣過二人世界嘛……
廉航機票不太廉
兩個人安安靜靜咁樣過二人世界咁浪漫？ 女朋友呢個諗法真係perfect池，所以呢個旅行，一切我都聽晒佢意見。 最後我哋好輕易地捕到去台中來回都係$88嘅機票，加埋稅都唔使$500，真係超值！！！！
咦！！等等，原本機票係唔包行李費，我同女朋友又唔係住埋一齊，每人都要帶一個篋，所以焗住每人都要買行李費。 最後加埋行李費，每人張機票大約一千蚊港幣……
咁樣嘅價錢咪即係同其他傳統航空公司減價優惠一樣？ 咁樣我哋有冇慳到呢？最後我都冇理，只想著開開心心同女朋友去旅行就算。
正如女朋友所講，一、兩個鐘頭機，啲乜嘢飛機餐、機上電影根本唔重要，座位窄少少又有乜所謂，上機瞓到落機咪仲舒服，所以我一啲都唔介意坐廉航。 但現實總係比想像中殘酷，當飛機起飛冇耐，坐我前面嗰位乘客就將個椅背調校到最斜嘅位置，根本就差唔多頂到去我心口前面。
雖然冇實質掂到我，但坐過飛機嘅大家，都知道嗰種感覺係幾咁唔舒服。 我曾經嘗試過叫前面嗰位乘客可唔可以將個椅背校番上啲，但佢回答我嘅係：
先生，你睇下周圍嘅人，十個著咗幾個人都係咁啦， 怕迫嘅話就唔好坐呢班機啦！
我環望四周，冇錯，好多人都係學似呢位乘客咁樣，將個椅背有咁斜校到咁斜嚟瞓。 原來呢個已經係廉航嘅潛規則嚟……
情侶住 hostel 的不便
好不容易捱過呢程機，同女朋友去到目的地，發覺我哋根本就唔係住酒店，而係住hostel…… 說好的二人世界呢？好彩女朋友喺呢間hostel訂嘅係兩人獨立房，但係房裡面係冇廁所，要上廁所或者沖涼嘅話，就要去出面嘅浴室同其他住客一齊共用……
我問女朋友呢間房幾錢一晚？ 佢話500蚊， 我心諗，三晚1,500蚊，加場機票嘅話，即係除開嚟，機票連酒店每人要$1,750， 比起我去台北慳咗$750，但我就要坐被人頂位嘅機，又要住間冇廁所嘅房。 如果畀我揀，我情願畀多$750算喇。
依家先嚟後悔冇用，須知道女朋友慳儉成性，我依家能夠做嘅嘢，就係唔好抱怨，好好哋同女朋友去享受呢個旅程。 最後呢個旅程機票酒店係慳咗，但日常使費使多咗，女朋友話慳埋啲機票酒店錢可以食多兩餐好嘅，但如果畀我揀，我情願住得好少少，因為我好想扑完嘢有得即時沖涼呀仆街……
台灣之旅去完，女朋友就話想去日本。
案例三：價錢平冇著數 晚去早返瞓機場
「剛剛先去完台灣， 又去日本， 日本使費好貴喎……」
「唔怕啦，坐廉航，住民宿窮遊咪得囉！最多我應承你，超過一百蚊嘅機票我唔會訂，咁得未？」
我當時心諗： 咩話？ 一百蚊嘅機票？你訂得到嘅話，我就真係唔怕同你去呀！
就係咁，我就陪女朋友一齊去搶機票。 每當間廉航一話有特價嘅時候，我哋都會準時12點前開定電腦、手機同iPad去搶平價機票。 可惜嘅係，無論我哋每次幾準時去捕機票都好，個網站總係會大塞車而load唔到平價機票，就算我哋好彩load到，填晒所有資料後，個價又會升番，就算再退一步貴咗都照買嘅話，又經常到最後畀唔到錢……
一次、二次、三次， 每一次去搶特價機票，都好似去打仗咁樣，而每一次都好大機會會輸，但又每一次輸完都唔忿氣咁，點都要買到一次先心足。
我曾經問過自己，其實我只係想買兩張機票啫，點解要做到好似求緊航空公司賞賜一粒還魂仙丹畀我咁嘅？整個過程好辛苦、好屈辱……
終於有一次我買到來回去東京嘅機票，不過係由百幾蚊追到上去每程488蚊，當我興高彩烈咁樣去到最後畀錢嘅步驟嗰時，我細心睇一睇， 機場稅加埋行李要$2,000一張飛，但去程夜晚六點幾機，回程係早上六點幾機，咁即係頭尾兩晚酒店全浪費，但如果換啲靚少少時間嘅航班，個價錢就要三千蚊……如果你話來回一千蚊我真係冇藉口唔去，但依家只不過係慳得嗰少少錢，而且機上幾個鐘頭連水都冇啖飲，又好大機會被人頂住個心口瞓， 值得咩？
突然嘅靈機一觸，我發覺之前自己根本就中咗啲廉航嘅仆街銷售手法嘅伏，先畀個超低價錢你，但機票數量極少，等你哋一班人以為好著數早早就捕喺電腦前面等開賣，但到最後你買唔到最平，就會退而求其次去買啲冇咁平嘅飛，到最後失去理智地去買啲根本著數唔多嘅機票，但自己心中就覺得已經平咗。
一下子諗通咗， 我冇去訂呢程機票，我同自己講，以呢間廉航嘅質素同服務嚟比較，我只會買連稅連行李費少於$1,500嘅機票。超過呢個數我唔會考慮。 之後我將呢個諗法去同女朋友講，佢話我傻，廉航點都會比傳統航空公司平，我話價錢係平咗，但計番服務同質素，其實有時我哋真係冇乜著數可言。
我建議話不如睇下啲傳統航空公司有冇優恵機票仲好啦，起碼人哋做優惠嘅時候，你都最少有一兩日時間慢慢去揀機票酒店後先訂，而唔使爭取時間買完機票之後先諗住咩酒店。有陣時撞啱啲日子，人哋國家唔知搞緊咩活動而迫爆人，到時真係一晚住宿費都貴過你機票所慳到嘅錢……
女朋友冇理會我，佢繼續每次航空公司做優惠嘅時候去捕機票，終於有次被佢捕到$1,600連稅連行李嘅東京機票，但我見個時間又係晚上六點幾飛，早上六點幾回程，我同佢講咁樣好浪費酒店錢，但佢話可以頭尾兩晚瞓機場……最後我並唔同意頭尾兩晚都瞓機場，但同意最尾嗰晚瞓機場。
還記得當時又係ANA做緊優惠，二千幾蚊就可以有靚時間飛羽田嘅機票，但女朋友話貴咗成千蚊，唔考慮。 其實慳慳埋埋嘅錢，都浪費咗唔少喺第一晚嘅酒店啦！
去東京幾日，我哋加埋使咗兩萬幾蚊飲飲食食同買嘢，過程大家都好開心。但回程時，瞓咗幾個鐘頭機場，我有啲唔係咁開心， 大家喺香港做得咁辛苦，點解去旅行要就住呢一千幾百蚊嚟要自己受苦呢？使費兩萬幾，兩個人食一餐和牛都成千蚊，點解我要為慳嗰幾百蚊而要瞓機場膠櫈嚟受苦呢？
坐埋呢次廉航，我發覺到有啲嘢係我未知嘅，就係登機閘口前，根本都未到上機時間，啲人已經不正常地排起一條長長嘅人龍等上機，我當時不以為然，仲慢條斯理咁等到最後一批人先入閘。其實女朋友都有催過我快啲上機嘅，但我話依家咁多人，我呢幾日行到好攰呀，我唔想企喺度排隊上機呀，最後女朋友都無奈地跟我做最後一批上機嘅乘客，不過女朋友話我依家唔排隊嘅話，等陣一定會後悔。
最後我明白點解佢會咁樣講，因為到我上機時，我座位上面嘅行李架已經被人佔據晒，根本就冇位可以畀我擺，其實我哋只不過係兩個裝滿手信嘅背囊，加一袋機場嘅手信，點估到連一啲位都冇得擺？？
最後搞咗一輪，空姐幫我哋搵到一個位放一個背囊，但另一個背囊同機場手信膠袋，就只能放喺自己腳下……回程又係撞到前面將座椅校到最斜嘅仆街。 返到香港，我同女朋友傾過，如果廉航唔係比傳統airline平太多嘅話，下次不如畀自己坐得舒服啲好嗎？ 女朋友話明白。
下集： 男友反擊！坐 ANA 住台場 5 星酒店 女友反應係？
本文獲張飛人授權轉載
張飛人 facebook：www.facebook.com/cheungfeiyan
