01）儀容要整潔、平實
成日都見到有女仔打扮得花枝招展咁去面試，其實係多餘嘅，話說我當年連頭髮都冇紮起，只係化咗個淡妝。航空公司唔會太care 你識唔識化妝、紮髻，因為請你之後就會有相關培訓。反而佢哋著重嘅，係你嘅言行舉止、面部表情等，所以笑容永遠重要過妝容～ 男仔就記得唔好gel到個頭太浮誇，同埋記得剃鬚。一般而言，只要你畀人感覺乾淨、整齊、莊重就OK了。
02）準備好你的自我介紹
首先係切勿死背，慢慢講，表現你良好嘅溝通能力。另外你需要有心理準備，考官好鍾意根據你嘅自我介紹去問你延伸問題，例如我當年提到自己有去過水上樂園做暑期工，考官就問我喺呢份工入面令我最深刻嘅係咩。我建議考生可以先講一個簡潔嘅自我介紹，然後喺適當時候作出補充，唔好一輪嘴講晒，咁就唔會被考官覺得你講嘢太過滔滔不絕。另外，你可以喺答問題時輕輕地加入自己嘅性格優點（例如係有耐性、有同情心），咁就可以好自然咁表現自己嘅長處啦～
03）表現實際，切勿空談夢想
聽過有唔少面試失敗嘅考生被問到點解想做空服員時，回答：「This is my dream。」 嗯…… 其實你話畀人知做空服員係你嘅夢想問題唔大，但要小心你會唔會畀咗interviewer 一個空有夢想、不求實際嘅印象。老實講，今時今日空服員工作唔容易，起薪點唔高、要受客人氣、要體力勞動，亦都唔係班班機有得去巴黎、馬爾代夫。個人認為如果考生能夠表現實際，令人覺得你有心理準備去應付空服員日常工作，會比「因為做空服員是夢想」更加impressive 。
04）讓考官知道你對空服員工作的了解
要說服interviewer 你係一個適合嘅人選，你就要話到畀人知你明白份工嘅要求。如果你一味話因為做空服員可以免費環遊世界、可以扮靚靚返工、可以識機師，sorry，門口喺你後面，interviewer會好快請你離開。奉勸各位準備面試嘅朋友，先了解一下空服員嘅日常工作，包括唔好嘅一面都需要了解，等interviewer知道你有心理準備面對做空服員唔美好嘅一面（例如係清潔廁所、被客人鬧、假日要離開香港等等），表現你思想成熟嘅一面，唔係玩玩下。
05）態度誠懇 Be passionate！
最後係你表現出嘅態度，我成日都話「心態決定境界」，唔係吹水㗎～ 航空公司競爭激烈，最能夠影響航空公司形象嘅，就係佢哋嘅前線員工。唔知你哋有冇留意國泰航空嘅廣告slogan「Service Straightforward from Heart」？意思就係指佢哋員工服務由心而發，姑勿論國泰服務係咪真係咁好，佢哋請人時，都一定會想揀啲態度真誠嘅考生去配合公司形象～ 記得要畀人一個態度誠懇嘅感覺呀！
說到底，一間商業公司請唔請你，佢哋比較重視嘅，一定係你可以畀到啲咩公司，而唔係公司可以畀到啲咩你～ 聰明嘅你，一定明我講咩嘅～ 如果你喺去面試之前睇到我篇文，恭喜你呀！因為你已經成功咗一半！加油啦！