早前，阿珍寫過一篇「行內人揭秘, 搭飛機如何有得upgrade？」的文章，似乎未能完全回應大家關於搭飛機升級的疑問，然後又有頻頻出境的朋友網上曬命，說得到 upgrade 坐 Qatar Airways 商務，惹來粉絲悲壯提問：
「究竟點先可以upgrade？我試過單拖著到斯斯文文咁check in，又試過勁遲check in都唔得嘅……」
網上經常都有翻譯外國文章「Upgrade坐商務艙 10 招教學」乜乜乜，其實都離不開「旺季旅行、衣著斯文」嘅老生常談，情況放在香港，現實到底係點？以下 3 個地勤前線的補充說法，可以畀大家多一個參考：
01 | 早或遲到機場 非upgrade關鍵
作為幕後操盤人、經手無數Upgrade Case嘅地勤姐妹E，歷盡滄桑咁表示：「有冇試過Upgrade、其實同有冇畀人暗戀過一様，都係睇你際遇嘅啫。」講到咁空泛，阿珍當然唔放過佢，E就補充「好多熟客都知道，有冇Upgrade空間、視乎班機有冇Overbook；所以話，早到定遲到機場，都唔係關鍵！」
02 | 只 Upgrade Loyalty 客？有例外！
網上傳言航空公司都會有張Priority List，E就話：「Club Level 當然是優先考慮，但其實 Loyalty 客仔並唔係想像咁多，計積分、計里數之餘，單身上機加埋個樣有親和力，通常最著數，總之唔好煩到啲阿姐就最好。」
不過亦有例外嘅時候，E就試過夾硬拆散兩個出差嘅銀行職員，仲要講到懶唔好意思話只能Upgrade其中一位，結果被選中嘅女士當場笑到合唔埋口，「唔梗要！我哋唔熟、同事嚟之嘛！」
睇見呢啲人性大出賣場面、都OK舒緩到工作壓力o架！
03 | Mileage 換機票的 Upgrade 案例
分享多個Case：阿珍最近試過用mileage換國泰機票，check in遇上overbook，地勤問可否轉遲一班、另加一張upgrade coupon下次用；但阿珍唔想遲、結果對方問晒佢 Priority List 上所有人之後，有人肯轉，最終都上到原機，仲 upgrade 埋 Premium Econ 呀！
