Airbnb是繼酒店，民宿之後，旅人喜愛的住宿選擇，可以住在當地人家中，仲唔係正爆新體驗？但無人想遇上貨不對版、強差人意、完全中伏，不幸如何韻詩遇上怪房東性騷擾，旅行搞到要逃亡真係慘！訂房時可以注意啲咩？入住時可以點應對？即睇睇 Airbnb 經驗者教路：
Q1：點算？真係遇到怪屋主！
- 訂房前要做足準備，出發前要同唔去是次旅行的朋友、家人講低 Airbnb 的地址及屋主資料，中伏時至少可以立即有照應！記得不時報平安呀！
- 訂房前記得睇網民評分，建議在訂房時選擇「整套房子/公寓」，雖然價格貴少少，但私隱度高又不會跟陌生人同房，比較安全。
- 經驗者建議入屋後可以先「拍照留念」，日後有爭執時便有證據在手。有經驗者指曾在日本被屈偷熱水煲，幸好事主一入屋便瘋狂自拍，發現電器從來都不存在，不至於被屈！
- 懷疑怪屋主會對自己有威脅，當然可以立即報警及離開。
- Airbnb 設有24小時熱線幫你立即搵第二間屋，又可以使用Airbnb Apps 內的即時小幫手，唔洗擔心會無房瞓！
Q2：明明係700蚊，做咩收我1,000蚊!?
- Airbnb會清楚列明 房租、清潔費 及 服務費，但原來有灰色地帶！有經驗者在澳洲訂房時，已支付350澳元清潔費，但最後多收200澳元。細問下才發現，原來本身包1.5小時清潔，因為職員OT 2小時所以要加錢。（佢做得慢又關我事？）
- 此類糾紛因屋主有「合理」原因及證據，Airbnb容易受理，自己就白白損失！建議訂房前逐一問清楚額外收費！
Q3：入住之後發現唔妥，想換酒店，怎樣才可以退錢？
- Airbnb明文規定，退錢要在入住後24小時內申請，而且要符合一定準則。
- 如果因為住屋環境問題（經驗者試過突然勁大雨狂漏水），記得同屋主溝通，因為由屋主申請才可全額退費，否則服務費絕不退回！
- 遇上態度有問題，窮凶極惡的包租婆，還是主動「出撃」！緊記要用登記 Airbnb 時的 email 提交申請及留下聯絡電話，否則Airbnb查唔到紀錄便會錯失退款時機！
- 有經驗者試過極力爭取，最終得到 40美金 Coupon 可以於下次使用，無服務費都叫補番少少！
Q4：日本、紐約Airbnb不合法，點填入境表？
- 當地的Airbnb不合法，照填地址怕海關唔收，重新填過一定浪費時間！但建議照填Airbnb地址，但不必食「誠實豆沙包」註明是「入住Airbnb」，當去「朋友屋企」住咁填就一定最穩陣！
- 記得不可亂填一間酒店！因為萬一不幸出事，當地警方會根據入境表資料搜查，錯誤資料只會令獲救機會減低。
Q5：喊出嚟！我俾人偷野呀！
- 如果在入住Airbnb時被爆格，報警後首先要留意自己有無財物損失。因為屋主有 Airbnb 提供的「第三者保險及意外賠償作保障」，所以不必太擔心。
- 而自己的損失，其實可以按照旅行保險的條約索償。因為各地的法律主要針對營業者，即使Airbnb 在當地被定為不合法，個人旅遊保仍然生效。
- 藍十字保險指，除非入住Airbnb被定為非法行為，否則受保人不會喪失公司旅遊保險的保障。
