唔一定要同居，一次長途旅行，都可以見到對方真面目
好多情侶都以為自己好了解另一半，但其實同居一刻先見真章，因為你會見識到佢所有生活習慣。
去廁所有冇瞄準？瞓覺會否批踭打人？邊個負責洗衫？煮飯呢？洗碗又點計？
若果大家想喺結婚前試下同居滋味，其實同伴侶去一個長途旅行，揹起個背包，租間可以煮食洗衫嘅民宿或者hostel，既慳錢，又可以體驗下兩個人一齊生活。
或者去盡少少……
可以去一年working holiday。
我同女朋友去咗澳洲整整一年，兩個人一齊生活，朝見口晚見面，就認清佢個真面目！由於生活上好多問題都要解決，除咗搵工之外，日常生活事事都要兩個人商量。
朝見晚見，矛盾盡現？
先講食飯，為咗慳錢，我同女朋友多數留喺share house食飯，起初同佢商量好每人煮一星期飯。我哋會一齊去超市買餸，留意住咩食材特價就買定做儲備。
女朋友是個食家，每日都想試新花款，今日食西餐，聽日想試日式，後日又身痕想煲湯，總之每日都要新款。喺澳洲嗰年，係我廚藝進步得最快嘅一年。
不過，雖然佢係食家，但唔係一個好廚師。輪到佢煮飯嗰個星期，當日我放工返到share house，未開門前幻想緊有個嬌妻，戴住圍裙，成枱都係美食。
點知一開門，只係見到一個煲喺度慢火煲緊，女朋友坐咗喺梳化玩電腦……
「煲湯？」我問。
「粥啊～」
「咩粥嚟？」
「菜粥，你成日食肉，啲便便好臭，食多啲菜就啱。」
聽落有啲道理，每日食肉真係要清清腸胃，正諗住讚女朋友有我心，點知打開個煲睇一睇，嘩！！！咁大煲嘅？！十個人食啊？
點知，女朋友話……
「我煲咗一星期份量啊！」
「……」
結果，我整個星期都食菜粥，但我腸胃真係變得好咗好多……
不過清潔方面，就由女朋友一手包辦晒，我只係負責晾衫。
除此之外，同女朋友一齊生活，佢會捉我每日洗面、迫我搽潤膚膏、灌我飲水……
不過，呢種生活有一個後遺症！當你同一個人相處耐咗，你就好難返轉頭。
一年過後，返到香港，變番自己一個人生活，返屋企時冇人衝出嚟攬住，一擘大眼又見唔到佢，你就會好想、好想快啲同佢一齊生活。
而當你有呢種感覺，就代表……呢個人可以一世。
