旅行地雷 有 2 個！
第一，做父母嘅，千祈唔好帶小朋友去旅行。
第二，做仔女嘅，千祈唔好帶父母去旅行。
細個第一次去旅行，屙嘔痛肚樣樣齊
我人生第一次旅行，係我七歲嗰陣，屋企人帶我去新加坡。雖然當時我仲係好細個，但一直到而家仲係記憶猶新。
飛機上扭計、坐車暈車浪、食唔慣外國嘢屙嘔痛肚、酒店生暴床唔肯瞓覺……
所有帶小朋友去旅行嘅麻煩嘢，我都喺旅程中做到足晒，我唔知屋企人會唔會好後悔帶咗我去，但的確，對我嚟講嗰次旅行真係好開心。
仲記得一到達新加坡我就開始發燒，阿媽照顧咗我全晚，周圍搵藥房買藥畀我食。
當年係廿幾年前，好少有人會自由行，但阿爸有朋友住新加坡，所以我哋一團十幾人決定自由行唔跟團，個個見住我病，惟有將水上活動延後。
幸好，可能係心情太亢奮，第二日參觀咗幾個動植物園，我就退咗燒。大約玩咗幾日，一行人租車由新加坡去馬來西亞，坐成八個鐘車，我即時暈車浪嘔咗幾次……
爸爸一句深刻的說話
到達馬來西亞當晚即時上咗去雲頂高原，由於我唔入得賭場，父母只好陪住我去玩隔籬嘅遊樂設施。
我最深刻嘅係，臨走嗰日有個朋友同我阿爸講：「一早叫你唔好帶小朋友嚟啦，玩少好多嘢！我就將個仔畀咗佢婆婆湊住先，次次去旅行我都係咁㗎！佢咁細個，去完都冇記憶啦！」
我阿爸答佢：「我理得佢大個記唔記得吖，但至少我記得呢次帶咗個仔嚟，一家大細去旅行，不知幾開心。」
其實阿爸個朋友講得冇錯，帶埋小朋友去旅行真係好辛苦，尤其遇着我呢類咁難搞嘅小朋友。
相隔咁多年，有時同屋企人食飯，講起旅行就一定會講番呢次新加坡之旅。如果有機會，我好想同番阿爸個朋友講：「我記得！仲記得好清楚添。」
計劃了一個被父母嫌棄的行程，但⋯⋯
亦因為呢次經歷，我發誓大個咗搵到錢，一定會帶屋企人去旅行。
不過我必須誠實，每次帶父母去旅行，去到當地都會鬧交……
去韓國阿媽唔鍾意shopping，寧願坐喺咖啡店休息。
輪到食飯仲麻煩過港女，日本又嫌食飯太貴、韓國嘢唔啱口味、台灣太多炸嘢、泰國樣樣都辣、外國餐唔啱、中餐可以留喺香港食……
而我老竇就有交通恐懼症，行遠少少去車站就開始黑面，途中不斷喺我耳邊講：「唉～跟團咪唔使煩囉。又要自己買車票，又要轉來轉去……」
我每次為咗計劃一個適合父母嘅行程，花咗好多心血。但到頭來，就係被父母嫌三嫌四，有時真係幾嬲。
不過諗深一層，以前嘅我咪又係咁麻煩，父母都一樣帶我去旅行啦。再加上，我相信呢啲回憶，對父母同埋我嚟講，都係咁珍貴。