大陸親戚住你屋企，噩夢嘅開始……
話說我住喺大陸嘅親戚，佢叫白龍。聽阿媽講，佢落嚟香港玩，非常喜歡呢個地方，但又懶得搵酒店，於是諗住呢段時間住我屋企。我上網聽過好多呢種案例，都係新年先會嚟住，畀幾百蚊利是當租酒店，但而家聖誕節都未到，有冇搞錯啊？
我問阿媽呢個大陸親戚打算住幾耐，點知阿媽話：「你講得冇錯，佢真係打算住到新年…」就係嗰日開始，我人生就好似世界末日一樣……
妹仔大過主人翁
老老實實，我唔係要求一個外來人住我屋企要幫手掃地，但佢每日都會食到成地花生殼，垃圾亂掉。我阿媽驚會惹曱甴，所以每日都抹番乾淨個地下，個大陸親戚已經一條友霸住張梳化，仲話平時喺屋企都係咁，「沒關係，掃一掃就好。」
文化差異，爆發矛盾！
我發現文化唔同，真係唔可以一齊生活。我所指嘅唔同，係有文化同冇文化…… 去完廁所唔沖廁，喺廁所屙屎食煙，成地煙灰。
佢腳甲留到好似深山野人咁，仲成日放對腳上梳化坐，同我哋講：「沒關係，這裡有位置，你可以隨便坐。」我真係寧願企都唔會坐佢隔籬。
帶你四圍遊唔係「老奉」㗎！
有日，阿媽要返工，叫我帶佢周圍玩。佢剩係想去購物，我咪帶佢行尖沙咀。全日我都變咗一個隨從咁，佢全程望住個WeChat，佢嘅大陸親戚朋友，就不斷 send 相畀佢，話要買呢樣嗰樣。
佢逐樣問我喺邊度買，有啲就算我係香港人，見都未見過係乜嚟。買完嘢，佢話：「不用你這麼辛苦了，你休息一下吧！」
我睬佢都傻，佢一行開我就攞齊嘢入商場 coffee shop，佢竟然話我冇交帶，嗰條街係購物中心點，依家要佢行遠好多唔方便。
大食懶！黐飲黐食 仲「黐」埋我條底
佢每日出街都唔會食飯，一定會留番喺我屋企黐餐食。最近，我仲發現佢帶唔夠衫，開始攞我啲衫同孖煙囪嚟著！莫講你係我親戚，連我老竇都唔會著我條孖煙囪吖大佬！
唉！我仲要對住呢個當正自己係皇帝嘅白龍哥一排，真係唔知點算。我明白唔同生活環境，會有文化差異。
「白龍哥」的做人態度……
前排有單新聞，日本小學生嚟香港嘅沙灘玩，佢哋唔單止會帶走自己垃圾，仲會清理地上唔屬於佢哋嘅垃圾。因為日本小朋友由細到大，老師都會教佢哋：「去每一個地方，離開時要令呢個地方比你嚟之前更美。」
意思除咗指你去一個地方，離開時有義務清理其他人遺留嘅垃圾之外。仲講緊你做人要有教養，對社會有貢獻，你嘅存在會令呢個社會變得更好。
白龍哥明顯冇呢種心態，希望呢個只係「個別事件」……
網友回應：個案分享鬥坎坷！
（編按：有讀者表示藍橘子的分享可信度不足，不過卻有更多Fans留言分享自己的親身經歷，似乎大家對招呼親友都有切膚之痛！）