開幕一日嘅啟德東華慈善嘉年華，喺平安夜晚上吸引大批市民入場，車位爆滿，機動遊戲故障，留言鬧爆，到底衰乜？喺嚟梗幾日會唔會有改進？打算入場嘅朋友，快啲睇睇首批白老鼠嘅留言合輯，睇清楚中伏位先出發，以免掃興吖嘛：
01. 停電、故障、半天吊！
昨晚網上頭條當然就係「陀飛輪開玩一日故障20分鐘」，9人半天吊嚇到鼻哥窿無肉，好彩最後都有驚無險，平安落地！不過失靈原來唔止陀飛輪，其他小型機動遊戲亦遭殃，有網民表示：「免費遊戲停2次電，排足2小時⋯⋯第一次去一肚氣。」
02. 親子遊掃興
如果未去過啟德，真係唔建議大家晚黑進場，皆因適合小朋友嘅區域似乎仍未完全玩得，尤其入夜後更加供不應求，有家長網民喺專頁透露中伏實況：「買飛時，問清楚係話開到 2300，1800 增晒值，小朋友的跳彈床又話太黑冇得玩! Hot wheels 車又截龍! 小朋友可玩的基本都冇得玩! 完全係一肚氣!」亦有家長表示：「6pm竟然截龍小朋友冇車揸！你們寫明至11:00，充了值冇得玩！非常不滿！平安夜很嬲！」
官方漏夜檢討，即時於臉書作出回應：
「由於反應熱烈，每項機動遊戲乘載量有限，我哋每日會設有指定數量嘅免費名額，送晒就無㗎喇！如果排隊人數超出機動遊戲乘載量，我哋未必可以確保遊客享用呢個優惠，我哋亦有可能因應現場情況而作出更改而不另行通知㗎！」
03. 泊車位不足，泊咗都要行餐飽
比起就近中環嘅AIA，位於啟德嘅東華嘉年華當然係偏遠少少，平安夜晚上，未到晚上7點，120個泊車位已經爆滿。官方呼籲市民於油塘搭免費Shuttle前往，如果想知道其他公共交通前往方法（其實郵輪碼頭的泊車位設計，亦唔太方便，要由頭行到尾，腳都軟埋），請看以下連結：【啟德嘉年華@點樣搭車去最方便？】
04. 供電不穩，廁所無燈
去過西九露天活動嘅朋友可能了解，作為戶外活動場地，流動廁所無燈係常事；不過主打一家大細玩嘅東華嘉年華，配套就真係令人失望，供電似乎好唔穩定，入夜後排流動廁所要用手機打燈，夜晚去真係濕滯，網民KL表示：「係呀，廁所竟然冇燈！我要用電話電筒先睇到……」據現場特派員透露，基本上整個場地入夜後都燈光不足，而且場地沒特別鋪路，本身甚荒蕪，大風時沙石比較多。
05. 攤位到底開咗幾多成？
網民詬病「未開晒」，就首日現場情報所見，大約有 70% 攤位遊戲開幕，最平嘅HK$20一局，遊戲的水準亦頗參差，如果夾硬用AIA比較，可能會感到失望喎！不過搶眼嘅係有Inside Out主角公仔。
相關文章
【東華嘉年華2015】場內攻略、收費＆優惠、營業時間9大QA！
