【睇極光鴨仔團】冰島3大極光巴士團大比拼！

每年9月至4月係冰島極光旺季，有車牌可以租車自駕遊當然冇問題啦，但如果你好似我哋嘅特派員KiKa咁冇車牌，又係咪真係跛腳鴨，焗住參加貴價巴士團唔好玩呢？每晚大概9點，雷克雅未克市內都會有大量旅遊巴直出發到所有睇極光的地方，團費價格約由HK$400起。今次KiKa就直闖「雷克雅未克」玩足5日巴士團，報告實況畀各位「無牌仔」知！

文：Kika | 攝：Yee Ng @新假期周刊　　

Tour 1) $400迫爆巴士團人山人海睇極光！

價錢：ISK$6,400 / HK$400
時間：出發9:50PM > 回程12:30AM
車程：來回約1小時55分鐘
團員：約80人
行程：首都Reykjavik > 市效Threngsli 停車場

Reykjavik Excursions 是冰島最大的巴士旅遊公司，賣點係你喺飛機上，己經可以報名當晚嘅極光團，而且如果睇唔到，第二日會再免費比你多一次機會。到咗目的地，除咗自己同車大約80個團友，之後再相繼有5架大旅遊巴到達，全場近400人，場面人山人海，與想像中寂靜嘅極光構圖完全唔同。

曾經參加Reykjavik Excursions 極光團的網友留言指，此公司會考慮極光指數及雲層厚度，大約於下午 4 時半至 5 時公布當晚會否出團，而不少 Reyjavik 酒店也會將出團資料放在酒店 reception 枱前。亦有網友分享經驗，

網友 Janeter：我參加過 RE 的極光團，當日多雲，極光指數只有2。我喺當日下午 12 點幾已收到電郵話極光團取消。

全車80人，你與導遊嘅距離好遙遠，不過如果有問題發問，在熄燈前，佢都好樂意過嚟答。

【跟團過程大解構】

當日我志哋喺晴朗的一天出發，網頁寫9點半至10點係巴士去酒店接人嘅時間，但當晚等到9點55分先有車，中間等待嘅25分鐘仲以為自己被遺忘咗。

事實上旅遊巴冇去酒店，而係泊喺轉角街口，再落車搵團友，司機語氣仲勁差咁叫「Go! Go!」。

旅遊巴會接送到公司巴士總站再轉乘另一架巴士，但過程冇人講要行咩方向，建議係櫃檯問清楚好。

幸好當晚遇上超強極光，肉眼目擊嘅極光更加Amazing！

跟得過指數：★★☆☆☆

補充資料：

【地點】固定於Thingvellir 國家公園、小鎮Hella 或西部Snaefellsnes
【網址】www.re.is
【服務】專線唔係24小時，可以於10點出發前，在該公司巴士總站報名，要留意此團不會每日更新資料及通知是否出團，想去就要主動啲去問啦
【買點】睇唔到可以免費再去一次。

Tour 2) 90% 保證見極光！老爺車極光團！

價錢：ISK$7,900 / HK$494
時間：出發9:05PM > 回程12:30AM
車程：來回約1小時30分鐘
團員：最多19人
行程：首都Reykjavik > 油站洗手間 > 不知名車站

對比之前不論天氣如何都會照常出發嘅巴士極光團。另一間叫Gate To Way 嘅中型巴士旅遊公司，喺Trip Advisor 網站上得到最高評分，其網站更指「只要出發，90% 保證見到極光。」，面對變幻莫測嘅極光都可以囂張如此，唔可以睇少！遇著天氣差，都唔好驚住，因為月光太強會影響觀察極光，情況就如城市有光污染睇唔到極光一樣。

【跟團過程大解構】

天有不測之風雲，Gate To Way 極光團亦連續兩日6點半前喺網站上公布取消行程，到第三日天氣稍為好轉，但依然雲層厚實，網站查看竟寫上照常出發，令我帶著「因為要做生意先唔取消」嘅心態出發，誰知擁有26年帶極光團經驗嘅領隊Bob很放心指：「今晚雖然天氣差，但我們望向的位置應該11點左右就開始有極光。」

到目的地之前，會先到油站讓大家去洗手間，喺大團冇㗎！領隊亦講咗足足20分鐘關於極光嘅故仔、研究極光嘅歷史以及自己睇咗廿幾年極光都唔悶嘅經驗，仲會解釋極光嘅流動轉向。

投身極光團超過50年嘅司機伯伯Pjarmi 多次隔著車窗與雨水，指出隱形極光位置叫大家落車影相，百發百中。

「老練」領隊用嘅車都係老爺車，除車門難開關，離開時另一架小巴死火行唔到，大家仲要落車幫手推。

坐的是16座位的小型巴士，在約45分鐘的車程後停在公路旁不知名的小徑上，未到預計極光出現的時間大家可以安坐車中，聽導遊講極光故仔。時間到，即使下著雨，大家也看到淺綠一片在前，相當神奇！Bob自豪咁話：「睇極光靠的是經驗與科學，並不是運氣！」

跟得過指數：★★★★☆

補充資料：

【接送】30分鐘前在酒店門口等待接送
【地點】因應極光探測決定
【網址】www.gatewaytoiceland.is (每日6:30PM在網頁公布是否出團)
【服務】24小時專線，團被取消只要打去講名字及說清「Rebook Northern Lights tour」即可

【買點】睇唔到可以免費再去一次。

Tour 3) 最平最抵巴士團，$400有找！

價錢：ISK$6,106 / HK$382
接送：45分鐘前在酒店門口等待接送
團員：約80人
地點：因應極光探測決定

有研究過冰島巴士團嘅朋友都知，境內觀光主要由兩大公司包攬，除咗之前嘅Reykavik Excursions （幕後由長途巴士公司Grayline 營運），後者嘅極光團HK$400有找，全城最抵，乘車配套、夜攝時間跟第一團分別唔大，行程亦與第一團差唔多，但人數更澎拜！幸運地當晚極光夠強，肉眼可見嘅舞動時間持續45分鐘，大家可以睇到夠！