實況旅遊、一地花生

將於4月開播的ViuTV，去年已經播出另類旅遊節目預告《跟住矛盾去旅行》，當時以「林日曦VS蔣麗芸」唔講嘢去首爾做噱頭，殊不知原來節目仲有更加重量級嘉賓，就係立法會主席曾鈺成 VS 梁國雄議員，二人在去年聖誕節期間竟然去咗波蘭，當地在前年有一個全新的「抗爭博物館」，兩位議會敵對組合，會唔會約埋去睇下波蘭人激烈抗爭的歷史？！

至於節目仲有幾多「拗氣」旅遊組合呢？即刻睇睇：

梁國雄 VS 曾鈺成 = 波蘭聖誕旅程

二人前往波蘭過聖誕，長毛率先預告曾鈺成今次自找麻煩「呢次佢真係戇居」，但係曾主席全程陰陰笑，拍攝時仲未曾發表「人血饅頭」論的長議員交足戲，節目入面到底邊個戇居咗？真係好難預計！

何韻詩 VS 高皓正 =愛爾蘭都柏林

2月底剛剛出發的組合，由「高主教」於fb自拍劇透，據講目的地係愛爾蘭都柏林，一齊出發就係早年宣佈出櫃的何韻詩，作為虔誠基督徒高皓正去到曾舉行同志婚姻公投的城市，到底有咩偉論會發表？

林日曦 VS 蔣麗芸 =未出發 先火滾

去年已經播放預告的組合，「腦細」林日㬢全程黑臉，自己方設計零對白完全唔啋蔣元秋，睇到預告都爆笑！

葉蘊儀 VS 連詩雅 = 港女對決意大利

連詩雅與葉蘊儀到意大利佛羅倫斯，真係識得藝術嘅Gloria對住Rest in Pieces嘅連詩雅，似乎藐嘴指數會爆表！

戴夢夢 VS 邵音音 = 低俗峇里

基本上口沒遮攔的音音姐本身已經好好睇，戴夢夢存在感就算再薄弱都無所謂，二人身水身汗去峇里，夢夢會唔會表演剝裙&換褲呢？

聽講節目本來仲有邀請「健吾 vs TreeGun」、「周庭 vs DreamBear」，不過因為唔同原因而未必成行，你仲諗唔諗到更多無可能同場的旅遊夥伴組合？！

相關文章

成為合格好旅伴的 9 個條件

4 種奇葩旅伴要不得

六項選擇旅伴的重點