有因航 空姐 做機上廣播嗰陣，將「聯合國兒童基金會」講成「連核格兒童基斤會」，同行都忍唔住網上投訴。個post一出，花生友即刻加把口，話空姐變譚仔阿姐真係接受唔到囉！咪住先，阿珍的空姐朋友明明話，佢哋職前考試真係要pass咗中英普 3 個機上廣播，先可以畢到業，咁冇奶油差到咁都上到場？！一再詢問，原來機上廣播甩轆炒粉都有唔同情況同理由，一於同大家分享番。嗱！講就咁講，接唔接受就由你喇！
聯營航班的禍？
好似國泰咁，因為要通過廣播考試先可以pass，正常都唔會有咩狀況。不過有時因為同其他航空公司合作，好似日航、南航同馬航咁，對方嘅空姐都有機會做廣播，但「講東話」就……你懂的。而呢類航班安排通常冇咁有默契，臨時換人都經常發生，咁窒機都好人之常情咁話。
煲冬瓜並不普通
學過煲冬瓜的都知道佢個名普通，但聲韻調一啲都唔普通。所以話有時聽普通話廣播，都聽到有唔少笑料。好似降落時噴空氣清新劑，會叫大肚婆掩口迴避，結果孕婦變怨婦。仲有明明係將「鞋子請放椅下」會變「孩子……」，阿珍身為土生土長香港人，冤苑縣……怨婦……嗯，明嘅！
弄巧成拙表演式廣播
既然乘客對機上廣播咁有期望，有空姐真係試過落力為你好，出盡力做好佢。開始chok聲先，「歡迎各位親愛萬分的乘客乘搭ｘｘｘ航空，今日的機長係型英帥的佛倫天奴，佢係百分百香港人，有人話佢側面好似Chilam bla bla……」嘩！唔知仲以為係介紹香港先生出場。其實咁用心，阿珍認為咁都鬧就唔應該啦！但笑佢，係絕對可以嘅！哈哈哈！