去澳門睇完黃鴨下水，在岸上乾睇都幾無癮，自己都心郁郁落水玩埋一份。可惜香港海洋公園的水上樂園要2018先見影，去開澳門不妨玩夠兩日一夜，免費享受埋酒店的玩水設施，實行濕身入夏！
text: yuki | photo: twotung、Yee（原文刊於新假期周刊）
01| 銀河唯一的秘密 天浪淘園 9 米高透明滑梯
去年銀河二期開幕，水上樂園「天浪淘園」面積擴大一倍，最近仲增設多個玩水設施。不過全世界都講「空中激流」飄流河道，其實同期亦新增 3 條 9 米高的「衝天激流」滑梯，滑梯隱藏石山之中，霸氣先輸一截。但原來禾稈冚珍珠！
記者玩勻3條梯，以橙色的衝力最強，最初以為得9米感覺流流哋，但第一次試玩都忍唔住失聲尖叫；綠色梯則最搶眼，其中一截以透明水管飛出石山，轉足 2 個圈先落水。
入住銀河住客免費使用，試玩時撞正Check-in後 3、4 點高峰期，泳客數目不算超多，排隊速度快，三條梯玩完再玩都得！
下一頁：100%濕身！$599起住酒店兼玩漂浮河
$599起住一晚 玩濕身度 100% 漂浮河
話激流，倒不如話「激卸妝」來得貼切！坐水泡在全長 575 米的河道漂浮，彎彎曲曲穿梭叢林及人造沙灘之間。全程有不同速度的段落，亦設多個上落水位，唔一定要漂足全程。
拍攝貼士：眼見不少人都旨在影相打卡，記者試玩的過程中，仲見到泳客連防水殼都無，拎住艾瘋沿途影相自拍。不過奉勸各位千祈咪搏，沿路有多個「瀑布式」倒水位，完全避無可避！Model因為影相工作，戰鬥格濃妝上陣，不過玩完一次即卸妝，大水到連假眼睫毛都險飛甩，濕身消暑度100%！
不過天浪淘園只限入住銀河住客使用，街客想畀錢入都唔得。要玩，可以揀銀河五間酒店之中，價錢至抵的百老匯酒店，連來回船票平日 $600 都唔使，請兩日假玩返轉都抵！
天浪淘園
面積：75,000平方米（約9個足球場）
位置：JW 萬豪、Ritz Carlton、大倉、悦榕庄及銀河及百老滙酒店三樓直達
開放時間：8am – 6pm
下一頁：轉場「新濠影匯」！ 8 字摩天輪下的漂浮河
02 | 新濠影滙挑機 hea住浮遊亞馬遜
去年開幕的新濠影滙，最記得的是超搶眼的 8 字摩天輪！撞正開幕時入冬，玩水設施真心零宣傳。其實在 3 樓戶外泳池位，一樣有漂流河「綠野遊踪」玩，在今個 5 月頭正式重開啦！
全長 450 米，雖然速度和長度都比銀河的遜色，大約 15 分鐘就玩完，在一開頭的落水位，水力特弱，撥到手軟都唔多郁。聽員工話，飄浮河原名叫「lazy river」，畀人 hea 爆浮住曬太陽，好在園景以熱帶雨林做主題，漂住睇巨口鱷魚和亞馬遜古廟都幾得意。
場內仲有 3 條小兒科滑水道，難度各有不同，由巨石口滑出，小朋友實鍾意。設施免費開放住客玩，非住客入場要成 $330，不少本地客都鬧超貴無得玩。
綠野遊踪@新濠影滙
開放時間：9:30am – 6:30pm
住客入場費：免費
非住客入場費：成人 MOP$330、小童 MOP$130
