識我嘅朋友仔都知我係地獄黑仔王，影 Outdoor 會落雨，出 Trip 會遇到騎呢事，黑到自己都覺得每次出完 Trip 可以成個人完完整整咁返香港已經好叻！今次就同大家講吓剛剛去首爾，竟然喺 弘大 見到金光黨的經歷！
話說當日喺弘大企街影 Snap ，熱辣辣 30 幾度已經企到個人有啲燥燥地，突然有兩女子狗衝埋黎問野，作為有禮貌的香港人當然四萬咁口回答：「Sorrrrry，其實我只是個小遊客，問路的話其實我都唔識呀」，估唔到佢地開始問埋晒啲古怪問題：「(國語)你們在幹啥？」吓？黎做咩野關你蛋治咩？所以聽落真係覺得唔對路，於是即刻亂答話黎觀光之後即速拉隊走人！估唔到佢地竟然唔放過我地，死纏爛打更開始「野外露出」狐狸尾巴，話同我地一齊行！喂呀！真係同你好熟咁喎，我搵韓妹一齊玩好過同你兩個呀珠媽行街啦！最後唯有用大絕招，一行四條友當佢地透明，完全無視先甩到身！
之後問返喺韓國 Working Holiday嘅朋友仔，先知呢排首爾街頭出現勁多金光黨，專揀遊客開刀，目的除咗為錢，仲話會帶人去埋晒啲古怪儀式，真係嚇死人地呀媽個仔咩！
金光黨特徵如下：
1. 兩人一組 （有男有女）
2. 識講多國語言 （國語、韓文、英文都識，真係避都無得避）
3. 多數以問路作開場白，確認你係遊客身份後就會開始問你黎首爾做咩？住喺邊？……等等
對付方法：
如果一個人遇到都幾難甩身，唯有邊行邊講行返出多人嘅大街，至少保障自己的人身安全先！如果問拎錢，死話自己無錢佢都無你辦法，但如果佢想帶你去其他地方（e.g. 試韓服，食好西等），請堅絕拒絕兼掉頭先！如果企喺度傾隨時講成個幾兩個鐘先甩到身呀！
如果成班人遇到，只要簡單無視再快步離開已經搞掂，佢地無癮亦會知難而退。
近期首爾治安唔算好，地鐵又有勁多金光黨，所以街上已經多咗警察巡邏，不過去玩嘅朋友仔，都記得要小心啲呀！