text：Mandy@《新假期》
以下8大推介，記者已在2017年1月底截稿前，致電向各店查證新年期間營業時間，如欲前往，請留意以下紅字標註日期。
01 | 失傳潮州小食 全澳唯一冷糕店
作為90後嘅我，冷糕呢個名，聽就聽得多，但係唔好話食，就連見都未見過，今次去到澳門就決定要尋找呢間遠離遊客區嘅傳統食店：吳廷記。提提大家，農曆新年期間，吳廷記會暫定出售冷糕，改為賣年貨，要初十之後先有得食，我就好好彩咁趕到尾班車。
冷糕係六、七十年代嘅流行潮州特色小食，但係因為製作工序複雜，所以已經愈來愈少人會整。冷糕嘅讀音比較特別，同潮州「打冷」個「冷」字讀音相同，果然係來自潮州，連讀音都零舍「潮」。
冷糕食落外脆內軟，有少少似雞蛋仔，但係就更加煙韌，加埋花生碎、砂糖等，又有少少似格仔餅。新鮮熱辣嘅冷糕，外層直頭脆到好似薯片咁，不過凍咗之後就會開始變韌，所以大家記得趁熱食喇！
吳廷記
地址：澳門下環下環街15號地舖
電話：(+853) 2856 5393
營業時間：星期一至日9:00am-5:30pm 初十先有番冷糕出售
02 | 地膽推介 關閘文記豬扒麵
位於關閘嘅文記豬扒麵，係記者嘅澳門朋友誠意推介，佢話雖然近年嚟都咁多遊客慕名而來，但係豬扒麵一樣咁有水準。但係要注意係年廿八就收爐，初六先會開！親身試過之後，發現果然冇介紹錯，豬扒整得極香口，雖然好熱氣，不過因為太好食，都要放縱一下。提提大家，嚟到記得要試埋文記秘製辣椒油，愛辣嘅我簡直食到停唔到口！
文記豬扒麵
地址：關閘廣場新寶花園地下W
電話：(+853) 2823 0506
營業時間：7:30am-5:00pm（每月1號、11號、21號休息一天）年廿八收爐，初六開市
03 | 唔使去韓國都食到！全港澳首間Isaac Toast & Coffee
未去過韓國嘅我，都久仰當地出晒名嘅Isaac Toast，依家終於喺近近哋嘅澳門都有得食喇！相信韓國愛好者對 Isaac Toast 都唔會陌生，好多人都試過為咗呢件三文治而一早起身，最出名嘅火腿芝士吐司，喺明洞分店就已經日售過千份。
網上見過有朋友仔話要排20分鐘隊先有得食，但係我當日就好好彩，一去到就有位，祝各位好運。
Isaac Toast & Coffee
地址：澳門龍嵩正街8D號祐生大廈地下A1座
電話：(+853) 2832 9993
營業時間：星期二至日8:00am-8:00pm
04 | 澳門名物 世紀咖啡厚蛋多士
香港出名有「厚多士」，澳門都出名有厚蛋多士。世紀咖啡外賣店位於大三巴附近嘅小巷盡頭，記者都差啲 miss咗睇佢唔到。店外長期都排住長龍，無論本地人定遊客都有，有網民話世紀咖啡係大三巴附近少數本地人仲會幫襯嘅食店，質素有番咁上下保證。
今次冇揀到豬扒包，反而揀咗鹹牛肉，鹹牛肉味道啱啱好，唔會太鹹，重點係個厚蛋！真係好好味！好好味！好好味！（重要的事要講3次。）厚蛋煎得啱啱好，咬開入面仲有蛋漿流出嚟，絕對唔會太老，一個字：冇得彈！
除咗多士之外，花生奶油方塊亦係另一推介！雖然近幾年好多地方都有得食類似嘅甜品，但係呢個絕對係我食過最好味嘅奶油方塊，每塊都烘得啱啱好，唔會太腍又唔會太硬，而且花生醬同奶油都十分足料，每啖都會被醬料「漿」住個口，超級邪惡！再加上有花生粒喺表面，口感更加豐富。
叫得世紀咖啡，又點少得咖啡呢？呢度嘅咖啡係用炭燒瓦煲煮成，熱飲炭燒味比較濃，變相有啲苦，不過可以自己加糖；凍飲就反而有啲太甜，記者喺現場都聽到唔少熟客都叫少甜，下次嚟到都會醒目識得叫少甜。
世紀咖啡外賣店
地址：新馬路賣草地里7-15號長信大廈地下
電話：（+853）6377 9664
營業時間：星期一至日11:00am-7:00pm 初五開市
05 | 新增茶市 抵食順德炸鮮奶
之前都聽過呢間太艮堡陳老太順德料理幾出名，但係一直都覺得價錢有少少貴，所以冇去試。大部分主菜單上嘅嘢食茶市都有提供，可以過足口癮。
太艮堡陳老太順德料理
地址：新口岸孫逸仙大馬路澳門漁人碼頭意大利館地下
電話：(+853) 2881 3322
營業時間：星期一至日11:30am-3:00am 全年無休
茶市時間：11:30am-5:00pm
06 | 新濠影匯食街 獨家分子雪糕包
上年11月開幕嘅新濠影匯，酒店入面嘅設施當然夠晒新淨，而且人流唔算太多，行起上嚟好舒服。以本地美食為主嘅「澳門食街遊」，以小食攤檔為主，今次介紹嘅 SCIENCE LAB 算係當中最受歡迎嘅一間。分子雪糕喺香港已經唔算新鮮，但係澳門相對就比較少，加上將雪糕放喺麵包上面，食落都幾新鮮。
一見到呢個吞拿魚粟米包就已經想試，吞拿魚味嘅分子雪糕入面加咗粟米粒，口感都幾特別，而且麵包烘過，一冷一熱咁都幾好食！（不過賣相就有少少理想與現實喇……）
SCIENCE LAB
地址：路氹連貫公路新濠影匯購物大道2樓2077號舖
營業時間：星期日至四10:00am-11:00pm，星期五及六10:00am-12:00mn
07 | 心穎BB都食！北海道芝士蛋糕Pastry Snaffle’s
北海道出晒名嘅 Pastry Snaffle’s 輕乳酪蛋糕店，終於開到嚟澳門，連心穎BB都支持！店舖位於官也街附近，十分方便。Catchcakes 全部由日本空運直送，質素絕對有保證！
提提大家，如果心大心細唔知揀咩味好，可以選擇雙拼，價錢一樣，但係可以有兩種口味，都幾friendly。
Pastry Snaffle’s
地址：氹仔舊城區水鴨街15號喜來登廣場地下C座
電話：（+853）2857 6081
營業時間：星期一至日10:00am-10:00pm 初二開市
08 | 網民推介- 伙兄弟美式越南粉
根據網民推介，原來伙兄弟美式越南粉的湯底係好好，清甜又足料。不過真係好多人去食，如果大家新年去食，真係要早少少同預時間排隊了！
伙兄弟美式越南粉
地址：澳門大街(營地大街) 140-A號 紅窗門大廈地下C座
電話：(+853) 2892 1782
營業時間：星期一至日11:00am-10:00pm 初四開市
前往澳門有哪些交通方法？
可以選擇金巴或港澳快線或金光飛航及噴射飛航。到達澳門後，則可坐輕軌氹仔線，途經碼頭、機場、多間酒店及主要旅遊區，澳門自由行時交通更加方便！而澳門酒店由設計到設施都非常出色。
有什麼澳門好去處？
澳門有不少新設施及全新好去處，其中澳門賭場、必去景點及食買玩介紹，玩轉澳門！然而，澳門美食眾多，除了豬扒包，也可到各大酒店享用自助餐及打卡必去的陽台Cafe當半日文青。
