圖片及資料來源：Blog OH! Note! 小燦的旅行筆記、fb OH！Chance！澳燦旅行資訊
單程最平約$486 飛首爾包行李
「首爾航空」是韓亞（Asiana Airlines）全資的子公司，剛成立1年，基地位於仁川，主要飛日本及東南亞城市。趁開航1周年紀念，香港飛仁川最平單程只需₩70,400/約$486，仲要包埋15kg行李！價錢同HK Express有得揮，絕對買得過！
凌晨去晚返 時間用到盡
「首爾航空」往返香港暫時每日只有1班，凌晨機去晚機返，時間靚仔，對於唔想浪費分秒的首爾迷來講，絕對抵到盡，收工入機場，回港日又唔使即刻仆返工。
| 航班 | 時間 |
|---|---|
| 香港 -> 首爾/仁川 （RS532） | 01:00 – 05:30 |
| 首爾/仁川 -> 香港 （RS531） | 20:10 – 23:00 |
包行李包飲品的廉航
雖然叫做廉航，但「首爾航空」的票價已包括15kg行李，而且機上還會提供飲用水與果汁，唔似那些一蚊都計到盡的廉航。鍾意去首爾瘋狂shopping的朋友可能要認真諗諗喇！
自選服務收費一覽
雖然票價已包行李費用，但跟一般廉航一樣，都有其他自選服務收你錢，如果要自選座位，收費₩15,000-30,000/約$103-207不等，飛機餐則由₩10,000/約$69起。不過要留意，「首爾航空」會收取no show費用，唔似HK Express咁，購票後唔搭都冇問題。
「首爾航空」座椅相距32吋（81cm），比HK Express闊10cm，雖然都唔算特別闊落，但對於腳長的朋友來講，至少對腳唔會無時無刻頂住前面座位咁辛苦！
另外，「首爾航空」的座椅並非採用現時廉航常用的超薄式，而是稍為有厚度。
如果要優先選擇普通座位，「首爾航空」要₩15,000/約$102一程，比HK Express $45貴超過一倍。又或者可以在航班起飛前 48 小時至1小時到「首爾航空」官網辦理網上check-in，到時就可以免費揀座位。
02｜免費橙汁供應
飛機起飛後，空服會向每位乘客免費提供清水及橙汁。
所有食物都需要起飛前48小時預訂。如果有訂餐，空服會先確認，送完飲品之後無耐就會送上餐點。有三文治、意粉、海鮮料理、牛排等等，價錢₩9,000/約$61至₩15,000/約$102。
如果冇事先預約餐點但又肚餓，機上都有速食可以提供。
03｜座椅後竟有電視
機上每個座位都有一個6.5 吋觸控電視螢幕，解析度非高清但都算清晰，亮度都足夠。
可惜博客小燦乘搭當日，螢幕暫時只可以見到選單，節目中亦有兩套影片，但撳下去都係無法播放，只有在飛行途中由航空公司安排播放娛樂節目約40分鐘，其餘時間均播放飛行資訊。
螢幕下方有遙控器，設有閱讀燈開關掣以及空服呼喚鐘。
o4｜備有USB叉電位
機上椅背有唔少方便設備，例如大家好多時都需要的 USB 叉電位，在飛機上補充一下電源完全冇問題，抵讚！
USB插頭下方有一個小置物空間，可以放置眼鏡等小型物件，唔使怕放在雜誌袋內唔記得攞走。
螢幕右方有一個鈎仔，可以掛外套或者眼鏡袋等。
另外每3個座位就會有插頭位，好多航空公司暫時都冇，在廉航有這樣的設施更加難得。
最新的韓國入境要求詳情？
韓國宣布即日起至2月底，所有來自香港及澳門航班必須使用仁川國際機場降落， 即睇：韓國入境最新要求限制。在入境韓國前，建議也可買定韓國電話卡，部分更有通話功能，以及選定心儀酒店。
韓國首爾有什麼好玩推薦？
首爾美食多籮籮，即睇美食推介，而醬油蟹絕對是其中一樣必食美食；一人旅遊到首爾不知到哪覓食？大可到訪首爾可以一個人用餐的人氣獨食餐廳。玩樂方面，滑雪是不可錯過的活動，5大滑雪場適合新手一日遊，亦可到樂天世界大玩遊樂設施及韓服體驗。另外，也可用幾日時間到釜山玩返轉，即睇首爾去釜山交通懶人包。準備到首爾賞櫻花的大家，可預先一看首爾櫻花預測及賞櫻地點推介。
