提起馬爾代夫，除左諗起「椰林樹影、水清沙幼」哩八個字外，仲有就係個「貴」字！閒閒地住晚水上屋都盛惠$5000起，真係諗起都肉赤！但最近網上竟然有人話可以用$600在馬爾代夫包個島？原來想窮遊馬爾代夫，其實唔難！
唔係講笑，原來由南印的特里凡得琅國際機場去馬爾代夫，單程機票只係＄388 ！如果你本身已經諗住去印度流浪，不妨順便去埋馬爾化夫扮下奢華（實質窮遊）。如果唔想經印度去馬爾代夫，最抵的方法就搭虎航飛新加坡再轉飛馬爾代夫，單程連埋稅大概係＄1900左右，比直接買由香港飛馬爾代夫(有中途站）足足平$900㗎！點樣可以用$600包個島？
馬爾代夫有起碼1200個珊瑚島，只係揀島都揀到你暈！簡單嚟講，在馬爾代夫的住宿大抵分為3類：水上屋：就係果啲一開門就可以跳落海果種，不過價錢都貴到令人想跳海，一萬幾千一晚走唔甩！一價全包：很想要吧！一個價錢包3餐，大概都係$1500左右一晚，但係就要搭$3000~$5000搭水上飛機去，真係偷雞唔到蝕把米！居民島：自2010年馬爾代夫開放民宿之後，馬爾代夫唔再係帶錢人的專利，例如在Rasdhoo島或者Maafushi島，一晚都係大概$250起，窮遊首選！
解決左住同行，但就算幾窮遊都要醫飽個肚，唔通要餐餐食罐頭？咁又唔洗愁！馬爾代夫四面都係海，居民通常都係靠捕魚為生，而住在居民島的好處除左可以更親近當地人之外，更重要的係你可以搵佢地幫你捉魚！一條野生捕捉的海魚在當地只需10個Rufiyaa，即係大概$6左右！之後你就可以拎返民宿整返味新鮮烤活魚！嘩！真係諗起流口水！