去旅行，最煩就係搞簽證，尤其係一啲較冷門的國家！而眾所周知，手持特區護照的香港人，要入玻利維亞， 簡直可以講話要「過五關斬六將」！由於玻利維亞在香港無領事館，所以唯一的方法就係飛去北京搞簽證，等一個月，仲要未必得！就算係手持BNO，都要入境官員當你係英國人處理先「過到骨」，但生得一張亞洲人臉孔的你，都係唔好FF咁多喇！咁如果真係好想去玻利維亞咁點算？唔通真係要在的的喀喀湖偷渡過去？

自2014年5月起，持中國護照、香港特區護照及台灣護照都可在秘魯辦理去玻利維亞簽証啦！而在秘魯可辦簽証的領事館有以下5個：Lima、Cuzco、 Puno、 Tacna同埋 ilo ，其中以Puno過境最近及方便。辦簽證的申請表有兩頁，要親身上去拎，唔好諗住可以上網下載，有得比你搞簽證已經係好大進步啦！

申請簽證需要準備咩？
1. 護照
2. 離開玻利維亞的機票
3. 入住玻利維亞酒店的訂單
4. 信用咭
5. 黃熱針咭（在秘魯打只收2 sole, 巴西更係免費，不過最好當然係預先在港注射）
將以上影印本連同一張證件相及填妥之申請表一併遞交，然後領事館職員就會手寫戶口號碼叫你去銀行繳交申請費用，盛惠美金30元。

可以逗留幾耐？
簽證期限係一個月，如果想延期，要到La Paz, Sucre, Santa Cruz等地的入境處申請。
成個簽證過程好簡單，只要文件準備妥當，一個半鐘就搞掂！