去旅行搵好嘢食，識食的一定係留意當地人推介，一定冇死錯人。記者每次去首爾旅行前，都會瘋狂上網睇韓仔韓妹的SNS，睇睇有咩人氣必試 首爾美食 。今次為大家整理好近3個月來於韓國網上討論度極高的10間餐廳，間間排晒長龍，人氣到頂點，經過採訪及無上限試食後，真心冒出「我下次返鄉下要再嚟食」的念頭。

text： Chu Dragon | photo： Woody（原文刊於《新假期》923期）

#01 | 90蚊有找 無限refill冇限時勁食五花腩

超人氣的烤肉店，店內雖有200多個座位，但無論任何時間，門外仍是排着長長的等吃人龍。₩12,900/HK$89的無限refill套餐有五花腩及豬腩肉，還有3款配餸包括辣醬雞爪、雞肉，以及芝士粟米，真心可以食到你爆胃。

識食韓式烤肉當然係要包蔬菜，只要另加₩2,000/HK$14即可無限refill蔬菜籃，想連₩2,000都慳番的話，都可以到counter任攞蘿蔔片來包豬肉吃。而包豬肉必備的蒜粒、泡菜及芽菜同樣任攞唔嬲。

這裏的另一賣點是烤肉壽司，即係俾壽司飯你自己將烤過的肉放上面自家做壽司，唔好睇小呢1招，好多韓仔韓妹好buy覺得好過癮，大家不妨一試。

Flowers Pig Gallery 꽃돼지 갤러리
地址：首爾市麻浦區臥牛山路19街19 (서울특별시 마포구 와우산로19길 19)
電話：+82-(0)2-3144-3319
營業時間：12:00nn-12:00mn（逢星期一休息）
交通：地鐵2 號線弘大入口站9號出口步行10分鐘
Ig：flowerpig_gallery

#02 | Super Junior、EXO係常客 韓國最靚三層肉

食過勁受年輕人追捧的任食五花腩，想要更高質素的嗎？有！店名已經話你知：高品格三層肉。Super Junior、EXO燦烈、棒球明星李鍾範等全部都係粉絲！

房老闆說：「烤肉用最好吃的三層肉及頸肉，脂肪多油香與肉香融合，就能吃到烤肉的最高境界。」果然，全店只有三層肉及豬頸肉選擇，另有韓牛刺身。豬肉都是厚切，無論油香與肉香俱備。

至於包肉用的蔬菜都與別不同：因為強調是高品格，唔想傳統地用大大片生菜包肉，令人要大大口咁食，故此轉用細細塊的醃蘿蔔或醃紫蘇葉，食之前再點自家製蝦醬。如此這般的配搭令肉味更具層次，是另一番的烤肉體驗。

高品格三層肉 고품격 삼겹살
地址：首爾市江南區江南大路640 (서울특별시 강남구 강남대로640)
電話：+82-(0)2-540-0786
營業時間：10:30am-10:30pm
交通：地鐵3號線新沙站8號出口步行4分鐘
fb：고품격 삼겹살

#03 | 佐酒雞爪 升上神枱做主食

有蒲開韓國酒吧，都會知道韓國人鍾意用雞爪做佐酒小食。暖男雞爪打正旗號只食雞爪，8款食物中有7 款係不同煮法：辣醬麻藥（即會令人上癮的）、芝士、辣湯、蜜糖炸及普通炸雞爪。有部分可選有骨或冇骨（只去掉了主骨），細小的趾骨均已去掉，食都食得優雅舒服，不用忙着lur骨。

話說韓妹勁鍾意食雞爪，認為其骨膠原豐富好養顏。加上肉酸的趾骨都已去掉，令雞爪狀不似雞爪，得以升上神枱做主食，更深受一眾韓妹歡迎，無怪乎全院滿座99%都是囡囡。

暖男雞爪 훈남닭발
地址：首爾市麻浦區臥牛山路19街 9號 (서울특별시 마포구 와우산로19길9)
電話：+82-(0)2-332-4892
營業時間：4:00pm-3:30am
交通：地鐵2 號線弘大入口站9號出口步行10分鐘
fb：홍대 “훈남닭발”

#04 | 男團質素好養眼 靚仔靚景天台泰菜

梨泰院的超人氣泰菜PP Seoul，由經理至廚師到侍應清一色全男班不特止，個個顏值更達到model及男團的級數！

其實PP Seoul具人氣並非單靠靚仔，其天台座位能飽覽首爾巿景觀才是亮點。餐廳位於梨泰院近半山的地方，就在南山公園左近，位置夠高，可清楚地居高臨下欣賞到首爾市全景。

食物方面以傳統泰菜為主，大部分材料均來自泰國。相比起食物，飲品選擇更多：用泰食材做的各式cocktails，就連傳統的泰國飲品如泰國奶茶及泰國咖啡亦有。唔好泰菜，嚟望住靚景飲杯嘢睇囝囝也不為過。

PP Seoul
地址：首爾市龍山區素月路44街3號 (서울특별시 용산구 소월로44가길3)
電話：+82-(0)2-749-9195
營業時間：2:00pm-12:00mn（逢星期一休息）
交通：地鐵6號線梨泰院站 2號出口步行約18分鐘
fb：PP Seoul

#05 | 每日手製限量意粉 精巧擺盤相機先食

韓國人好喜歡食西餐，故此當初知道OUR dining好受韓國OL歡迎不感驚訝；然後得知係每日新鮮手製限量50個麵糰，做出3款意粉，包括Linguine、闊條麵Pappardelle及Gnocchi，亦抱着姑且一試的心態。

前菜炸risotto波製成如柚子般，比起普通的炸飯糰原個放上碟來得可愛。

招牌菜鯖魚意粉，亦將意粉排列成原條鯖魚般的大小長度，浮游在一片澄黃的檸檬牛油醬汁之上，畫面絕佳，加分不少。

除了擺盤具心思，用料細緻且豪爽不手軟同樣是賣點：Black truffle意粉用黑松露炒過之餘，上枱前亦不忘刨上最少5片的黑松露片，是滿滿的黑松露滋味。

OUR dining 아우어다이닝
地址：首爾市江南區新沙洞648-19 (서울특별시 강남구 신사동 648-19)
電話：+82-(0)2-516-5056
營業時間：12:00nn-4:00pm，6:00pm-10:00pm
交通：地鐵盆唐線狎鷗亭羅德奧站5號出口步行約9分鐘
Ig：our_dining

#06 | 韓妹爭住拍片 搶Fo燒芝士火燄蝦

呢間唔止要影相，直情要拍片放上網吸like！晚晚排長龍等食的，就係店家最出名的鐵板火燄蝦。

鐵板蝦就是於爐上熱着1個類似雞蛋仔般，有一個個圈的honeycomb鐵板，放滿cream cheese，再放上已8成熟的蝦；上枱時再於其上灑滿芝士碎，然後侍應就會用火槍將芝士燒溶，壯觀的火燄係景點之一，個個韓妹都爭相拍片。

火燄蝦 민혁이네 외국포차
地址：首爾市麻浦區臥牛山路15-7 (서울시 마포구 와우산로 15-7)
電話：+82-(0)2-333-3457
營業時間：6:00pm-3:00am
交通：地鐵6號線上水站4號出口步行3分鐘
fb：민혁이네 외국포차

#07 | All-day Cereal 40款穀物片過百種食法

Midnight in Seoul全日全天候全店剩係食cereal！共有40款不同形狀不同味道不同顏色的cereal，可配搭牛奶或乳酪或雪糕，另有約8款不同toppings如棉花糖、朱古力豆、乾果、軟糖等等。


最過癮最受歡迎係惡搞電影的包裝盒系列：《Mission Impossible》變成Midnight Impossible、《Kill Bill》變成Kill ceREAL。另外亦與時裝品牌如Diesel、Beyond Closet聯乘推出穀物片盒之餘，仲有cap帽、衛衣、tote bag等等。

簡單的1間cereal店但動作多多，因為老闆們都來自創意範疇：有時尚造型師、時裝攝影師及動物攝影師，仲有元老級組合g.o.d成員尹啟相；而2am的趙權最近亦加入成為第5位老闆。加上fancy的裝修佈置，影相打卡成為主要，食cereal都變成次要了。

Midnight in Seoul
地址：首爾市江南區彥州路147段18號 (서울특별시 강남구 언주로147길18)
電話：+82-(0)2-545-6321
營業時間：10:00am-10:00pm
交通：地鐵3號線狎鷗亭站 3號出口步行15分鐘
網址：midnightinseoul.com

#08 | 小區人氣店 真正的咖啡滋味

首爾café多過便利店，不同主題類型均齊備，如果係真正coffee lover的各位，亦有專業級選擇——Kim Yak Guk。

店子裝修冇特點，好簡單普通的，就係專賣咖啡的地方。店內咖啡都用危地馬拉咖啡豆自家blend製3款不同味道的咖啡粉，每次order咖啡時，都可揀心儀的咖啡粉。

金老闆更教路：「士多啤梨味有清新的berry味，飲Americano的話，最好用呢款咖啡粉；醇厚的榛子朱古力味同latte最夾；飲cappuccino可用濃香的花生醬味。」

Kim Yak Guk Coffee Roasters 김약국커피컴퍼니
地址：首爾市龍山區白凡路291 (서울시 용산구 백범로291)
電話：+82-(0)2-701-4700
營業時間：星期日至五7:00am-11:00pm，星期六8:00am-11:00pm
交通：地鐵6號線孝昌公園前站2號出口步行1分鐘
網址：kimyakguk.com

#09 | 華麗酒吧 50套電視劇取景地

去酒吧chill out大家着重的是什麼？梗係環境啦！極受韓妹歡迎的AY Lounge，每張環境相，甚或至店內每個角落每個小裝飾，都係極精緻華美的構圖。

由你踏進AY Lounge的一刻開始，就感受到何謂別有洞天。有如歌劇院閣樓層般採半開放式，令底層的樓底更高聳，有空間感之餘，感覺更宏偉。全店裝修走歐陸風：地上的花紋磚、織花地氈、牆上的華麗壁燈、闊大的皮梳化、沉實的木茶几⋯⋯無不顯示出當中的綺麗歐洲風情畫。

AY Lounge位於江南區，加上處於地庫位置，而且VIP房極多，吸引不少明星如李敏鎬、劉在石、鄭雨盛等幫襯。還有當中極之iconic的發光酒吧櫃，開業以來總共有50多套電視劇曾於此取景，最近的1套就是池晟主演的《被告人》，大家都認得出來嗎？


AY Lounge AY라운지
地址：首爾市江南區江南大路 92街13號 (서울특별시 강남구 강남대로92길 13)
電話：+82-(0)2-552-8199
營業時間：6:30pm-3:30am（周五及六至4:30am、周日至4:00am）
交通：地鐵2號線江南站12號出口步行5分鐘
網址：aylounge.wixsite.com/aylounge

#10 | 約會必勝地 私房格局歐陸fusion菜

Babylian Table可以話係韓國情侶們dating的必然地，餐廳裝修有如傳統歐洲家庭般，勁有格調，晚餐時配合昏黃的燈光，氣氛一流冇得輸。

主餐牌共有16款選擇，有海鮮有牛扒有意粉有薄餅，各式種類有齊。最過癮係每款主食都有少至7款多至11款不同的配菜選擇，最重要係免費而且並非求其是但沙律菜或雜菜湯之流，而係有如主菜般認真。

例如主菜為牛扒芝士火鍋，配菜可選Margherita 迷你薄餅或秘魯名菜Ceviche；又例如醬油蟹意粉主菜可以選配意大利開胃菜Bruschetta或烤帶子。無論環境與氣氛、食物都相當高質素。

Babylian Table
地址：首爾市江南區狎鷗亭路46街5-2號 (서울특별시 강남구 압구정로46길 5-2)
電話：+82-(0)2-540-3305
營業時間：10:30am-3:00pm，5:00pm-11:30pm
交通：地鐵盆唐線狎鷗亭羅德奧站6號出口步行5分鐘
網址：www.babylian.com

延伸閱讀：輕鬆平遊首爾！$500入住明洞新淨酒店

延伸閱讀：韓國線記者&地膽真心推介 首爾美食 10軒

延伸閱讀：明洞。超多贈品！ LINE FRIENDS 熊大兔兔酒店 (附地址)


最新的韓國入境要求詳情？

韓國宣布即日起至2月底，所有來自香港及澳門航班必須使用仁川國際機場降落， 即睇：韓國入境最新要求限制。在入境韓國前，建議也可買定韓國電話卡，部分更有通話功能，以及選定心儀酒店。

韓國首爾有什麼好玩推薦？

首爾美食多籮籮，即睇美食推介，而醬油蟹絕對是其中一樣必食美食；一人旅遊到首爾不知到哪覓食？大可到訪首爾可以一個人用餐的人氣獨食餐廳。玩樂方面，滑雪是不可錯過的活動，5大滑雪場適合新手一日遊，亦可到樂天世界大玩遊樂設施及韓服體驗。另外，也可用幾日時間到釜山玩返轉，即睇首爾去釜山交通懶人包。準備到首爾賞櫻花的大家，可預先一看首爾櫻花預測及賞櫻地點推介。