1) 110 款芭菲！選擇困難症慎入
作為日本九州過江龍，Ufufu café食材和各款雪糕都由當地直送，廚師亦專誠在日受訓半年，高度還原本店滋味大加分。天時暑熱，打開餐牌最吸引記者的，是店內超過 110 款雪糕芭菲，由水果、焦糖、抹茶、栗蓉都有，多到令人眼花繚亂。雖則價錢偏貴，平均一杯要六、七十元，但兩個女仔一齊食就啱啱好。
牛角包得外脆内軟有牛油香，香滑的奶油配朱古力醬，加上雲呢嗱雪糕球和香蕉片，甜中帶果香特別開胃。
梳乎厘内裡軟綿，配上甘味極濃的抹茶醬，吃一整客也不覺膩。
Ufufu
地址：新馬路天神巷 16 號天福大廈地下 A 舖
營業時間：12nn – 11pm
前往方法：乘 25 號巴士到水坑尾街下車，步行 3 分鐘即達
2) 盞鬼卡通馬卡龍 X 雪糕
馬卡龍一向是少女至愛，位於渡船台的韓式甜品店 Antique 專賣馬卡龍，老闆專誠向韓國人學師，加碼玩埋漸變銀河色，影相效果靚到爆！老闆仲自創多款卡通馬卡龍造型，並推出馬卡龍雪糕，在馬卡龍中間夾入冷壓雪糕磚，加上多款色彩繽紛的 topping，model 見到都忍唔住舉起手機狂影。以為得個靚字？馬卡龍入口外脆，食落煙韌軟綿，加上多款自製的百爵奶茶、維他奶、乳酪等獨特雪糕口味，連話要減肥的 model 都破戒食唔口，就知好味啦！
雪糕邊鋪滿脆脆、朱古力波、棉花糖等 topping，多重口感。
刨冰軟滑入口即溶，抹茶味甘澀濃郁，重度抹茶控必食。
微酸的乳酪口味，令人胃口大開。加上把雪糕壓成哈哈笑雪條狀，創意十足。
Antique
地址：澳門渡船台 16 號地下
營業時間：1pm – 9pm（逢星期一休息）
前往方法：乘 8 號巴士於渡船街下車，步行 1 分鐘即達。
3) 召喚兒時回憶
跟住澳門 foodie 的打卡靚相，搵到荷蘭園的小店 Vanille，由只賣文創手作到擴展開埋甜品店。他們的雪糕賣相精緻之餘，亦本著手作理念，雪糕、果醬到奶昔都是自家每日新鮮製作，絕非市面買到的行貨；又以肚臍餅、聰明豆等兒時零食作 topping，有噱頭又有誠意。另外加$2，更可以加上棉花糖，影相一流。
雜莓奶昔 MOP$45 由自家製果醬加入鮮奶打成，入口有少量藍莓加紅莓果肉，果味新鮮不甜膩。
自選雙球雪糕 MOP$58 分別有奶油脆餅、雲尼拿、抹茶、朱古力四款味選擇。
果味醮上小杯上的爆炸糖，兒時回憶都返晒嚟。
Vanille
地址：荷蘭園路義士若翰巴地士打街 2B 號
營業時間：1pm – 9pm
前往方法：乘 8 號巴士到西墳馬路下車，步行 1 分鐘即達。（近禮記雪糕）
4) 呷中國詩意凍茶
同樣是外賣店，在在三盞燈的汴京茶寮並非開到成行成市的台式飲料店，而是主打以傳統手法沖泡的傳統中國和日本茶。雖則是外賣店，但沖茶卻絕不馬虎，每杯外賣凍茶都依足步驟，由加熱水三泡茶，再以冰鎮方式加凍，務求令茶身不會混入凍水沖淡茶味。天時暑熱，記者叫一杯九曲紅梅的凍茶，紅茶味清新甘香，再欣賞杯身印有獨特的三行詩，暑氣全消。
自家製茶凍以蒟蒻製成，一入口味道清甜重帶有少少花香，好味。
汴京茶寮
地址：澳門嘉路米耶圓形地3號三龍閣地下 B 舖
營業時間：11am – 11pm
前往方法：乘 25 號巴士到高士德下車，步行 1 分鐘即達