入門級追極光 | 打工仔速遊芬蘭攻略

每年11月至1月，都係北極光活躍嘅高峰期，身邊已經不停有朋友搶緊平機票，把心去見證這幸福綠光一趟，但係計劃起嚟，又有感無從入手。咁啱小妹趁復活節用10日快遊瑞典斯德哥爾摩和芬蘭，成功追極光！！雖然唔算係咩極光達人，但都可以簡單分享下行程、拍攝技巧同財政預算，等大家有初步概念！

相傳見到極光，係會幸福一輩子的哦！哈哈～～～

斯德哥爾摩的景色。

01 | 路線設計：留守芬蘭、北部Ivalo有勝算

出發去北歐的契機，係訂咗SAS北歐航空嘅機票，由香港直航至斯德哥爾摩，呢條航線久不久就有優惠。

出發喇！因為假期只得10日，我主力玩斯德哥爾摩同芬蘭，而睇極光就揀咗去芬蘭北部。

本身是想去再上少少的Inari，地理較北，觀賞有更大勝算。但結果酒店一早爆滿，惟有退而求其次訂Ivalo的酒店，好彩最後都冇失望！！

由於追極光絕對係要睇運氣，所以不妨預多幾日走盞。逗留咗Ivalo 4日3夜，本身都怕冇活動玩，但其實有聖誕老人村、Husky/ Reindeer Safari、滑雪等活動，4日行程排得滿滿，出乎意料地多嘢玩！

聖誕老人村的夢幻小屋。

02 | 財政篇：交通費都幾貴！！

撇除市內交通、膳食、 shopping ，總預算約HK$10,765！

分拆出以下細項：

機票連稅（香港來回斯德哥爾摩）：HK$4,500 （復活節旺季唔算平，SAS的話，最平見過HK$4,000）
平住 7 晚酒店：HK$2,265（平住，平均每晚HK$324，有時要share bathroom）
內陸機票（瑞典來回芬蘭）：HK$1,148
通宵火車由赫爾辛基來往Rovaniemi（順便慳兩晚住宿）：HK$1,950
Rovaniemi來回Ivalo巴士：HK$902

03 | 拍攝篇：最緊要識得 Focus at INFINITY!!!!!

出發前的疑問，係咪行出門口就睇到極光㗎喇？

答案係：極光強的話，只要在酒店外圍，搵個少光害的空曠地，已經見得到極光！！！

Hotel Ivalo房外的空地，入夜適宜捕極光。

每日查看極光指數新手可跟攝影師帶團

當地人其實每日都有準確的極光指數，預測到當晚捕捉的機會率。若果想睇到更澎湃的畫面，可以參加由專業攝影師帶路的追極光團，每晚價錢偏貴，但佢會開車向挪威方向北上，到有利位置停低，仲小班教學點樣set機影極光。報名網址：www.ivalotrek.com

對於從未影過極光，或者欠缺夜間拍攝經驗的新手（即係我），跟攝影師帶團就非常有用可靠！以上相片就係老師的示範作。

04 | 交通實用資料：懶人包－－照跟實冇死！

從斯德哥爾摩搭飛機前往芬蘭的赫爾辛基，機程約1小時。推薦當地的廉航 Norwegian，訂購網址：www.norwegian.com/us。從赫爾辛基乘通宵火車上Rovaniemi（聖誕老人村），需時約10個小時，雖然時間長，但有床鋪尚算可以節省當晚酒店費。車廂裡面有兩張碌架床，一上車即時搶先去用公共浴室，非常乾淨。
訂購網址：www.vr.fi/cs/vr/en/helsinki_en

由Rovaniemi乘巴士到Ivalo，事前可發電郵問定酒店喺邊個站落車，車程4小時左右，訂購網址：matkahuolto.fi/en 睇咗咁多，嫌煩的話，不妨報kkday的瑞典Abisko 4天遊，行程、住宿全包，只需要去到Kiruna Airport集合就有導遊，價錢抵玩，終極懶人之選：www.kkday.com/zh-tw/product/9019