大公司當然有大公司好處，但要知道其實你仲有得揀～
不同航空公司，除了會有不同的航線網絡、薪酬待遇外，更要留意其晉升機會、職場文化等，有得揀你至係老闆，一齊嚟睇睇不同航空公司嘅分別啦。
01. 主要基地
不同航空公司會有不同主要基地，例如係人都知國泰係 base 香港、Emirates係 base 中東。所以應徵前要考慮清楚你想以邊個地方為你嘅主要居住地。假如你成為外國航空公司嘅空服，就好可能要大部分時間都留喺果個地方，奉勸太過思鄉嘅姊妹都係揀返自己居住地嘅航空公司比較容易適應。而base 香港嘅航空公司就主要有國泰、港龍(現稱國泰港龍)、香港航空同香港快運。另外，日本航空(JAL) 有時都會聘請香港籍嘅員工，專飛途經香港嘅國際航線，大家可以留意返。
02. 航線覆蓋
想做空姐應該都係想見多啲呢個世界，去多啲唔同嘅地方。但有某啲公司，例如港龍，因為定位問題，比較多大陸航線、而日航就所有航線都會經日本。如果你問我，航線覆蓋最多嘅應該係Emirates，淨係英國都已經有 4-5 個城市航線，第二就係國泰喇，不過最清楚都係去返人哋個網站，睇下個航線圖啱唔啱你心水，其實了解航線仲會有助面試添㗎哈哈。
03. 晉升機會
呢點除咗係講緊升得有幾快，仲有係有冇得升。首先，一間航空公司規模有幾大絕對會影響你嘅晉升機會，大公司通常升得慢啲（8-9 年），細公司就升得快啲（3-4 年）。而有一啲外國公司，例如JAL咁，香港人想升職就一定要識日文，仲要去考JLPT(日本語能力試驗），如果日文唔好就唔駛旨意有得升喇～ 不過講到尾，公司升幾多人都 Depends on 佢個發展，如果佢擴充咁梗係會升得快啲啦，所以公司前景都會對你前途有影響㗎。
04. 公司文化
文化呢樣嘢好似好抽象係咪？其實航空公司嘅文化係離唔開 Seniority！你哋就當係紀律部隊果種必須服從上司命令嘅文化啦，但就係女人主導版！通常亞洲公司會比較著重 Seniority，而日本公司就係表表者喇。除咗要服從上司、無得駁嘴之外，喺呢種文化下，虛偽、迂腐、阿諛奉承、擦鞋呢啲事就總會有人做，只係程度上嘅分別，其實都幾難頂，勸大家要做好心理準備～
05. 語言能力
首先每一間航空公司都會要求員工能操流利英語，另外識講國語喺現今世代當然有著數。不過我個人總係覺得能夠講母語係最舒服開心，所以我揀咗間有好多香港人嘅航空公司，試諗下，如果你唔識日文，而你大部分同事都喺到講日文果下都幾唔開心。所以最好識當地語言先應徵外國航空公司喇。
如果你睇到嚟呢度，我相信你應該係有心應徵做空服嘅！條條大路通羅馬，其實間間航空公司都有好有唔好，揀間啱自己嘅，實現你嘅飛行夢。Get prepared for your dream and go for it. 飛機見！
照片拍攝於沖繩
兼職空姐姥姥
FB: https://www.facebook.com/parttimelolo/
