01.連乳酪都係自家製｜冇負擔天然乳酪雪糕
離大三巴不遠嘅「The Waltz Frozen Yogurt 華爾兹乳酪雪糕」主打每日以自家製乳酪加工而成嘅純天然乳酪雪糕。一試最多食客擁戴嘅「華爾茲」，雪糕奶味同酸味並存，開胃又順口，食落就好似華爾茲舞步咁輕盈，配埋健康嘅燕麥脆脆同新鮮生果，一個人獨霸成杯都唔覺得有任何負擔。
店主Ruby同老公去旅行時，被各地frozen yogurt嘅文化喚起咗一顆創業心。Ruby有呢個意念後，更毅然放棄護士工作，由零開始咁學習點樣製作乳酪雪糕，今年一月就正式開咗呢間屬於自己嘅乳酪雪糕店。
盛夏光年 (MOP46)
The Waltz Frozen Yogurt 華爾兹乳酪雪糕
地址：澳門關前正街37號地下
營業時間：11:00am – 8:00pm （逢星期二休息）
溫馨提示：與大三巴、新馬路同區，行過去快嘅話15分鐘內搞掂，另外坐18號巴士至草堆街落車亦可。
02.文具店內嘆盡各款猜不透嘅玩味雪糕
集合室內野餐、睇展覽、聽音樂、作藝術、醫肚餓、買首飾文具於一空間嘅Roomage 30，其雪糕口味次次都為我帶嚟無盡驚喜，仲稱職過男朋友。曾推出過嘅雪糕口味包括眼淚味、小時候味、綠巨人味等等，剩係聽個名係完全理解唔到佢咩葫蘆賣咩藥，真係要親口試過先揭到秘，慢慢更成為咗呢度嘅潛規則，問職員都解答唔到你。
小時候味 (MOP29)
夠薑味 (MOP29)
Roomage 30 空間叄拾
地址：澳門高士德區高地烏街 64 號東方花園商場地庫
營業時間：12:30pm – 7:30pm (逢星期一休息)
溫馨提示：位置就喺東南亞美食林立嘅三盞燈附近，食完魚湯粉去又得。由港澳碼頭坐12號至高士德落車再步行約10分鐘。
3.來一口冰極抹茶香
開業不久嘅汴京茶寮，完全係新橋區內嘅一片清泉，以發揚茶藝精神為本，拒絕跟大隊，唔賣珍珠仙草奶綠多多乜乜乜，卻憑住原片天然茶葉，為惜茶之人供應即場沖泡各式茶品而聲名大噪。而五月份仲推出咗店家自製嘅宇治抹茶雪糕，雪糕入口茶味濃郁，特別在佢入口後，屬唔係好滑溜順口嗰種，如圖所見，佢冰感偏重，食落好清爽有質感。
汴京茶寮
地址：澳門新橋三盞燈三龍閣地下B舖
營業時間：11:00pm – 11:00pm
溫馨提示：直頭開正喺三盞燈一帶，亞利鴉架街巴士站正對面。
04.由澳門過條橋就有得食嘅北海道名物
Snaffle’s 除咗北海道名物Catchcakes輕乳酪蛋糕外，5.4 北海道極上牛乳軟雪糕都係推薦之一，以北海道牛乳製成嘅雪糕香甜滑軟，嗰股奶香濃郁到下世紀都化唔開。
抹茶味Catchcakes (MOP125 /4個)
Snaffle’s Macau
地址：澳門氹仔水鴨街15號C
營業時間：10:00am – 10:00pm
溫馨提示：氹仔手信街（即地堡街）附近，新馬路坐33號巴士去嘅話，謹記喺官也街落車。
05.澳門本地學生最愛｜配料落得最爽手
喺澳門話題不斷嘅Yogo Macau，受歡迎唔係冇原因。呢兜配料full爆嘅乳酪雪糕性價比的確高，事頭婆落配料嘅功架直頭係可以用豪邁闊綽嚟形容，永遠有多冇少，好似有鋪癮咁，一疊啲粟米片呀生果呀棉花糖落兜乳酪雪糕度，就會煞唔到掣，有圖有真相。
乳酪雪糕口味每日更新，跟兩款配料。(大size MOP28)
Yogo Macau (海富店)
地址：澳門鮑思高圓形地11號怡昌花園地下
營業時間：11:00am – 11:00pm
溫馨提示：喺二龍喉公園附近，食完可以坐下澳門唯一嘅纜車，亦可能係全世界最短嘅纜車。
06.意大利空降到澳｜雪條形嘅gelato同鮮果雪葩
經過親玫瑰堂一帶，總會見到有人手執一碌以意大利雪糕或鮮果雪葩化身而成嘅雪條，今日終於忍唔住要隊番條成為佢哋嘅一分子。展示櫃上嘅雪條琳琅滿目，口味有朱古力、香橙、芝麻、北海道牛奶、開心果等下刪一千字。顏色好比Photoshop個色盤咁豐富。
三色雪葩 (MOP35)
點選心水雪條後，唔需要加錢已經可以揀朱古力脆皮同果仁配料，貪心鬼上身嘅我揀咗清新宜人嘅三色味雪葩，咁就可以故作精明咁一次過試晒菠蘿、草莓同奇異果味，然後再貪到盡加埋朱古力脆皮同粒粒。明明店員已經一再提示我：「建議雪葩唔加朱古力脆皮就咁食。」但我以一貫唔執輸嘅作風拒絕咗佢嘅好意，下次會記得醒水，因為奶類雪糕加脆皮比雪葩夾好多。
雪糕披薩 (MOP48)
Stickyhouse
地址：澳門大堂巷10號B-C和翠台地下B
營業時間：10:00am – 10:00pm
溫馨提示：喺新馬路／玫瑰堂附近，食完雪條可以沿住條衰鬼斜路行上大堂，個景睇得下。
07.踩過界｜法式餅店新推手工雪糕
以法式蛋糕、麵包同馬卡龍見稱嘅Cacao Patisserie ，近日再涉獵多一個範疇：推出每日新鮮製造嘅手工雪糕。雪糕款式冇固定，咩口味用邊款生果由師傅設定，暫時推出過嘅口味有綠茶芒果、士多啤梨雲呢拿、朱古力同車厘子芝士等等，可謂陸續有來。
綠茶芒果味雪糕 (MOP45)
試過綠茶芒果，兩種口味並唔係無分你我咁混埋一齊，而係迷彩式咁呈現出嚟，芒果味極香濃，綠茶味散出淡淡茶香，兩者平衡合體後甜度得宜。另外，店家亦都好鼓勵客人打開心扉咁贈下建議，擴大佢哋嘅雪糕口味數據庫。既然係咁，我唔客氣㗎喇！希望我心愛嘅百香果味可以盡快上場啦！
同場加映精靈球造型嘅士多啤梨芝士蛋糕。
Cacao Patisserie
地址：澳門渡船街75號地下A座
營業時間：12:00nn – 8:00pm
溫馨提示：可以由新馬路坐8號A到永樂戲院落車，再步行8分鐘。
下一頁：澳門傳統冰室、茶記 9 大推介
延伸閱讀
澳門 9 大星級靚景泳池比拼
澳門超大杯 Freakshakes 奶昔
澳門 4 大消暑甜品冷飲推介
