出發前幾日我心情梗係開心更興奮啦！
之但係，女朋友呢個期待嘅心情，早喺出發前一個月前就黎料！
好想去但個日子未到，咁有咩辦法呢？
女朋友就會逼人Plan行程同埋執定行李以安撫自己嘅焦躁。
「今次去得幾日，次次都差不多啦韓國，妳都熟晒，plan乜鬼吖…」
「咁執行李啦！」
「咁早執做乜啊！仲有成個月…」
「執定先啦！我驚妳帶漏嘢啊！」
「點會啊…」
「上次你連襪都唔記得帶啊！我已經整好咗個『執List』畀你！」
女朋友真係好有我心，每次出發前都會列張執list 出黎，列明我要執咩行李，確保唔會帶漏嘢。
但係女朋友有個非常特別嘅執行李哲學…
首先，佢一定要帶條大毛巾去抹身，因為怕酒店毛巾污糟。之但係…佢沖完涼抹完身，就會用條毛巾包住個頭周圍走，成粒鐘先放返落黎。搞到我次次都無得用，但又唔可以畀我沖涼先。
「我覺得條毛巾有濕氣再抹身好核突！」
「妳包住個頭成個印度妹咁周圍走唔核突啊？」
咁都算數，但佢為咗行李箱慳位可以塞多件戰利品，竟然唔畀人帶毛巾！
「男人老狗，你用面巾抹身都得啦！」
「抹完條大岩蛇又抹面，點抹啊…」
「得啦～男人老狗！」
「…」
呢種唔公平嘅對待，唔止係毛巾，連衫褲都係一樣。成日話慳位叫我著百搭衫，佢自己呢～又帶褲又帶裙，日日唔同款。
「妳行Fashion show定去旅行！」
「女仔出街要襯嫁！你唔洗緊啦男人老狗～」
「妳去到都實買到新衫啦！洗乜帶咁多。」
「我驚買唔到啊～」
「妳豆姐喎！買唔到嘢？太陽變三角形由西邊升起啦…」
結果不負所託，佢真係每次都買到嘢仲塞爆個行李箱添。
不過最令人痛恨嘅就係！
尋日我問佢執咗行李未。
佢話「未啊，咁急做乜…？」
自己去到最後一刻先執，但狂催我執行李去平衡返自己焦躁不安嘅心理…
到底係呢玩法？
ig：BlueGodZi
專頁：http://www.facebook.com/BlueGodZi
