近排有個朋友喺Facebook晒命，去度蜜月上機時成功升級商務客位，仲有蛋糕送，嗱！唔係話我杜遊珍貪小便宜，不過有著數就真係要八下！
機票想蜜月Upgrade，Agent幫到你？
原來首要條件係買Package或機票時要同Agent講定，之後就要睇睇間Agent有無Say喇，但始終要睇最後check-in時架機的Loading，不過地勤職員都會睇埋閣下衣著，所以如果想Upgrade就咪短褲踢拖，起碼都著條老牛啦！
訂酒店時寫明係Honeymoon，Upgrade機會倍增？
其實機票Upgrade與否都係其次，反而酒店房先緊要吖嘛，好多時大家透過Agent訂房講明Hoenymoon，就算無得Upgrade都會有支香檳送下，如果自己上酒店網訂，一樣可以試下喺「Special Request」入面寫埋。不過都聽過有人為貪著數，去泰國玩時呃酒店話係Honeymoon，結果酒店好好咁Upgrade房又送埋蛋糕同燭光晚餐，但後來意外被職員發現原來二人尚未結婚，佢哋竟然即刻改口話自己係寫「Honeymood」，唔係「Honeymoon」，仲怪職員自己睇錯喎。唉，樹唔要皮，必死無疑；人唔要面，天下無敵。
