今時今日去外國留學好普遍，老老實實我自己都覺得自己寫有關呢啲嘢真係唔多特別 :o) 反而睇上一代人或古人放洋留學既故事先過癮，例如《美利堅物語》，當時無論係通訊、交通、使費、同成個社會氣氛都同依家好唔同！
資訊唔使本 阿媽零距離
而家我日日同阿媽同Copy & Paste facetime根本係零成本，實在難以想像以前啲人要死慳死抵搵地方打IDD！又或者有朋友自遠方來（下一句：非奸即盗？），一個message 就可以通知對方啦，邊度等去邊間餐廳食嘢，googlemap 幫到手，想像以前要寫信呀、搵地圖呀盛咁，我地呢啲畀科技縱壞嘅死小孩，真係會崩潰！
留學邊會悶？ 網台做應援！
從前人嘅留學手記或口述，都發覺有個共通點，就係佢哋多數都會話「留學嘅生活好苦悶」；呢點同我現在嘅狀況係相反，不過我完全可以理解，雖然我係個從來都唔會覺得悶嘅人，不過想像我身處冇internet 嘅世界又真係會攞我命！
我時時都對資訊同知識極度飢渴，特別係依家香港立立亂嘅時刻，更加唔可以唔追新聞，而做嘅既時候令我長時間集中精神坐定定嘅，亦都係靠網台節目。
「網台L」謝曬皮的Playlist
我生活喺英國既日子裡，沒有一日係唔聽網台的；只要我喺屋企，就一定會開住。
作為排斥主流媒體既新一代，除左TVB同亞視我真係乜狗屎垃圾既台都會聽會睇，我是一個不折不扣嘅「網台L」，今日想同大家真情剖白我留英心繫香港資訊嘅 N 個頻道！冇廣告成份利申。
- 【熱血時報】﹣每朝起身第一件事就係開《大香港早晨 》，夜晚就聽《熱血政治》，從不間斷，雖然根據時差黎計係應該調轉，但習慣左改唔到。星期五會聽《笑死朕》live ，間中會聽下《古惑仔俱樂部》咁。weekend 既時候當上述全部我都聽曬，我就會亂click 下其他熱時既節目聽……
- 【MyRadio】﹣《毓民踩場》、《本土論壇 》一定走唔甩，我呢D 港豬有時要聽兩次先可以吸收到架；《勞思動眾 》都會聽。
- 【時空咖啡館格羅茲尼】﹣雲海自己既節目，平時好憎D人亂吹好耐都唔入題，雲海除外。 依家間中都會youtube 重溫摩星嶺4號
- 【Radio99】﹣主要聽花家姐講兇殺案，我想話聽佢D 節目時我真係可以高度集中，邊度都唔去。對我創作好有用
- 【星滙網】﹣只聽《陰謀背後》，不過依家都少聽；雖然主持人最近好多醜聞好多花生，但個節目有時都OKAY 既 蝦蝦
- 【光明頂】﹣ 19 fan 屎，冇19就唔聽。
- 【危險人物】﹣係翁靜晶嗰個無錯，呢個都唔算係網台啦係youtube 重溫，聽曬好耐啦好想翁靜晶繼續做囉
- 【蕭遙遊】﹣真係聽到冇嘢好聽都會聽老燒既，sor
係咁多，你地有咩推介？其實我咁樣聽法真係感覺自己冇離開過香港！所以今時今日無論係留學定係留港，咁多嘢聽點可能會悶呢？
完。