霏雲闖蕩「瀛」遊阿德萊德5大必食！

(Presented by EGL東瀛遊)

澳洲唔單止有非常豐富嘅風景睇，飲飲食食方面一樣咁精彩。上個禮拜介紹完塔斯曼尼亞之後呢，今次就等阿霏我講下阿德萊德（Adelaide）。呢度當然繼續有萌萌嘅野生動物睇，仲有市集行，當然唔少得好多唔同嘅美酒佳餚，最難忘嘅係上埋袋鼠島食零污染超正海鮮，嗰陣鮮甜到而家諗起都會流口水呀！

1. 袋鼠島食零污染海鮮

呢個距離阿德萊德大約112公里嘅地方，其實唔止得袋鼠囉，仲有樹熊、企鵝、針鼴鼠同好多品種嘅雀仔，島南邊嘅Seal Bay，仲有海豹同海獅添！不過海獅係受保育嘅，只可遠觀，海鮮就可以任食喇！

喺袋鼠島一定要試下好出名嘅淡水龍蝦，佢哋需要好乾淨嘅環境先至生活到，證明呢度係好似我同阿雲咁Pure喇。淡水龍蝦食落感覺清甜啲，而肉質一啲都唔輸蝕，爽脆彈牙！我就最鍾意白灼，靚嘅海鮮食原味已經好Perfect，唔使太多調味喇。

淡水龍蝦真係要喺個咁零污染嘅地方先可以生得肥肥白白。

其實字幕同我心聲一樣，解釋咗一切：非常鮮甜！

紫藍色殼係基因問題，其實一樣係好好味嘅袋鼠島淡水龍蝦。

仲有沙煲咁大隻蟹，肉質比較實，計我話都係龍蝦好食啲。

| 推介02 & 03 | 長龍蜂蜜雪糕 & Barossa Valley試靚酒

| 推介04 & 05 | 任食朱古力 & 地膽推介德國豬手

2. 排長龍蜂蜜雪糕

食完龍蝦大餐，點可以唔試埋另一名物蜂蜜雪糕呢？佢用嘅蜂蜜嚟自意大利引入嘅Ligurian蜜蜂，純種嘅Ligurian得番袋鼠島有咋！而真正極品蜂蜜唔止唔會過期，整出嚟嘅雪糕又滑又甜，仲有花香，絕對係女仔無法抗拒嘅甜品。

仲有好多蜂蜜產品，可以買返去俾親戚朋友做手信。

3. 三個長洲咁大嘅酒莊飲頂尖靚酒

紅酒白酒大家飲得多，葡萄園你去過未先？Barossa Valley有超過150個酒莊、80個酒窖，我哋就去咗歷史最悠久嘅Jacob Creek試酒，仲去埋澳洲最出名嘅牌子Penfolds自家酒莊參觀，鍾意葡萄酒文化或者飲番兩杯嘅朋友，一定要去呢個Valley睇睇。

Barossa Valley咁大，可以慢慢玩，喺Penfolds仲可以買到唔係成日有得賣嘅Grange紅酒。

想知阿雲做乜忍笑、我哋做乜扮醫生？睇片啦！

| 推介04 & 05 | 任食朱古力 & 地膽推介德國豬手

4. 任食二百款朱古力

呢間1815年已經出世嘅Haigh’s Chocolates一定要介紹，唔知係咪一年出一款新嘢啦，總之二百歲嘅佢，而家已經有超過二百款朱古力，就算帶夠錢買得晒，都有排試呀！

你睇我哋食得幾陶醉。

Haigh’s嘅朱古力夠晒醇，包裝又夠大方，呢個手信位走唔甩㗎喇。

5. 街坊食神推介正宗德國豬手

話說嚟Adelaide之前都做過下功課，去唔去德國村Hahndorf本身十五十六，咁啱喺Haigh’s買完朱古力同街坊搭下訕，講起我哋周圍搵緊好嘢食，大家都幾推介，反正唔遠，最後都去咗。離市中心大約只係30分鐘車程，係全澳洲現存最歷史悠久嘅德裔聚居地，喺度當然必試德國腸、豬手同啤酒啦。諗番起真係唔係誇張，我同阿雲離遠見到Hahndorf Inn招牌嗰陣，已經聞到好香嘅肉味喇！

150年歷史嘅Hahndorf Inn，嚟德國村一定要朝聖，食番餐勁嘅。

麻甩的阿雲同我講：人生有個真正朋友的確好極，飲啦！