霏雲闖蕩「瀛」遊墨爾本掘金搵神仙！

(Presented by EGL東瀛遊)

我同小雲嘅「瀛」遊澳洲之旅，呢集就講到墨爾本（Melbourne）。相比Sydney呢，我覺得Melbourne市區比較有藝術氣息，你睇片會見到有唔少靚靚建築同塗鴉，幾特別㗎。講到最值得High-light嘅嘢呢，一定係企鵝島同淘金小鎮！

1.企唔穩嘅神仙企鵝

好睇度：★★★★★
新奇度：★★★★★

企鵝島其實叫菲利普島（Phillip Island），上面嘅神仙企鵝係澳洲獨有㗎。佢係全世界最細隻嘅企鵝品種，喺呢度你可以超近距離同佢哋接觸，睇見佢哋行路一仆一碌，真係好可愛。提提大家呀，當局為咗保育，每年限制50萬人探呢班小神仙㗎咋。

怕凍嘅朋友可以好似我咁，喺室內睇佢哋回巢，一樣咁精彩。

Q：咁企鵝島點去㗎？
A：公共交通可以喺墨爾本市內Southern Cross Station坐V Line嘅巴士，自己揸車都得，2個鐘內可以到，唔遠，最方便當然係跟團啦，買飛同坐車都有人安排，唔使煩。

2. 時光倒流淘金古鎮

好睇度：★★★★☆
新奇度：★★★★☆

疏芬山（Sovereign Hill）呢個主題樂園，原汁原味咁保留咗50年代淘金時期嘅小鎮面貌，喺入面會好似回到過去，體驗到以前淘金工人點樣工作同生活，而且有唔少導賞節目可以Join，幾多嘢玩㗎。

除咗環境好有Feel，真係可以落手落腳淘金㗎，雖然我最後淨係淘到啲沙。

Q：咁疏芬山交通方唔方便㗎？
A：自駕朋友由墨爾本出發，沿西邊公路揸90分鐘左右就到㗎喇，或者可以坐V Line淘金特別V線火車去Ballarat，都好方便。

3. QV Market瘋狂掃貨

好玩度：★★★☆☆
新奇度：★★★★☆

全名其實係Queen Victoria Market，可以話深受當地人同遊客歡迎㗎，因為多嘢買，啲嘢又平，Market周圍仲保留咗唔少維多利亞皇后時代嘅建築物，影相位嚟㗎。如果你鍾意品味咖啡，一定要行埋去附近嘅Degraves Place，呢條Melbourne嘅咖啡街，有過百間Café，可以慢慢歎。

新鮮農產品、手袋、衫褲鞋襪、果醬、紀念品，乜都有得買。

Degraves Place我會話係咖啡版嘅蘭桂坊，咖啡迷一定要嚟。