春天潮濕大霧，相信成日幫你洗衫嘅媽媽一定心知肚明。而喺多霧嘅日子， 雲海 最常出現。雖然話呢啲天文現象可遇不可求，只要大家有恒心一定可以睇到嘅！
文：Fitz.hk
編按：登山拍攝、賞雲海初哥注意－－＃自己垃圾自己帶走，呼籲大家「帶幾多上山就帶返幾多落山，如果能力許可，幫手帶小小垃圾走，請盡量將垃圾帶到市區先掉」一齊保護環境！
根據天文台《氣象冷知識》提供貼士，要睇到 香港雲海 就有 4 個指標：
- 微風 (低於三級風力)
- 濕度高 (高於 95% )
- 雲層低 ( 300 米以下)
- 以日出前後較易睇到
Francis So 大帽山雲海短片
以上 4 個指標可以喺天文台網站搵到。當大家睇到天氣達到以上情況嘅時候，就可以出動睇 雲海 嘞。咁，可以去邊到睇？
01 | 全港最高：大帽山
- 風景：青馬及昂船洲大橋、獅子山、元朗錦田
- 路線：搭 51 號巴士大帽山郊野公園站落車，沿大帽山道行 45 分鐘。
- 好處：
1. 睇雲海首先考慮，就係要去到高地，全香港有咩地方高得過大帽山山頂呢？
2. 易去。若搭的士上山腰閘口，可以慳番 20 分鐘步行時間 - 注意：
1. 上山風大，注意保暖。
2. 有影友將大帽山稱為「白果山」，我都唔知典故。不過睇唔睇到 雲海 真係好講運氣。
3. 初哥郊遊注意，愛護大自然，記得自己垃圾自己帶走！
02 | 香港市中心：盧吉道
- 風景：中環、維港靚景。睇到幾座摩天大廈穿過雲層。
- 路線：由山頂廣場步行 15 分鐘至盧吉道。
- 好處：唔使點行，維港無敵景。
- 注意：盧吉道並非開放車道，而一般私家車根本唔夠位。早前有私家車誤入盧吉道，進退不得。
03 | 佛光普照：鳳凰山
- 風景：天壇大佛穿越雲海、南中國海密雲照
- 路線：
1. 東涌搭巴士 (往大澳、梅窩、昂坪等)，在東涌道伯公坳落車。車頭右邊方向上山。步行約 3 小時到山頂。
2. 於昂坪市集依照指示到「鳳凰觀日」牌坊 (心經簡林側)，沿山路上山，步行 3 小時上山。但路較難行。 - 好處：睇雲海之餘可以行埋山。
- 注意：呢條山路要有行山經驗先好去。上山之餘，亦唔好諗住帶晒所有傢生影靚相，盡量以輕裝為主。
流浪攝
04 | 虛無飄渺：大東山
- 風景：睇住雲層由山下吹上嚟，經過峽谷飛返落山。
- 路線：
1. 東涌道伯公坳上山，步行 1.5 小時
2. 梅窩南山營地上，步行 2 小時
3. 東涌由黃龍坑郊遊徑上，步行 2 小時。 - 注意：
1. 大東山爛頭營 (山間石屋) 為自願團體所有，石屋皆由義工出力出汗定期保養。請上山人士切勿上屋頂，以及不要污染水源
2. 這裏沒有垃圾桶，「自己垃圾自己帶走」
同場加映：唔上山都有機睇到
其實如果雲層夠低，都唔一定要上高山都可以感受到 雲海 。喺維港兩岸亦可以見到大廈穿插於雲層之間。而下面呢幅相，更加令你明白雲霧嘅優美。
