旅行遇上賊！三大 防盜 溫馨提示

1, 慎選隨身袋

其中一次在曼谷鬧市，模特兒孭著薄身tote bag，一不留神，就被賊人埋身鎅袋偷走電話。我企正喺隔籬，都完全唔知道事發經過，可見慣犯落手有幾快！之後每次出外都會特別留意番物料及容易打開與否，絕唔會用「薄切切」的tote bag或沒有拉鏈鈕扣的袋，貴重嘢都係放在身上或背囊暗格，以策安全。

2, 室內同樣高危

以為躲在室內就安全？那就錯了！又有一次在首爾弘大，當我們正在著名精品店內shopping，同行友人被人一撞，身上的手袋就被打開了，成個銀包不翼而飛，最可怕是佢完全感覺唔到！店員毫不詫異，兼完全冇提供任何協助，店內冇閉路電視，所以盜竊似乎經常發生，可憐我們要自己走到警署報案。人多地方，即使商店內都要特別留神。

3, 認清盜竊黑點

在歐洲，大廣場、觀光點固然是扒手搵食的地方。巴黎，最臭名遠播、最多小偷出沒的地方，不是鐵塔凱旋門，而是老佛爺門口！今次受害者輪到攝影師，遇上最蠱惑的吉卜賽人。首先賊仔指著他的頭訛稱有東西，當他不為意摸摸頭時，共犯早已將銀包拿到手兼逃之夭夭啦仲等你咩？在這些黑點，通常我任何人都不理會，不要有眼神接觸，一味直衝去目的地就算！

萬一不幸被偷竊，記低案發時間、地點及經過，第一時間去報警。雖然找到失物機會渺茫，但一定要取得報警紙，回港先有得claim保險。一句講晒，出門小心！