最後更新日期：2016年3月18日
注：以下所提及的價錢為來回連稅價錢，及未包廉航寄艙行李費，以淡季作標準。價錢及建議是小編個人之經驗，只作參考用途。
日本地區票價分析 最抵入手價
最低價：過去一年以來嘅最平價錢，可遇不可求。
入手價：搵機票個陣見到呢個價都叫做唔錯，買得過。
正常價：平時無優惠做緊嘅正常價錢。
01 | 東京
傳統航空公司黎講，老大哥國泰除左係Fanfares 會一個月見一次之外，價錢長期高企，若果係國泰忠實擁躉嘅話就要捱貴飛了；而ANA 及日航半年左右出一次早鳥優惠，價錢大約$2,600至$2,900，有兩件23KG 行李，仲可以早去晚返，絕對抵買！另外新開航線既埃塞俄比亞航空，長年累月都係賣緊2千左右，又有30 kg行李，其實都幾抵，尤其係旺季有時都有呢個價！
廉航方面，Jetstar 普遍係3間之中最平，但航班時間確實麻麻，只能午去早返，開航價最平試過來回$536，入手價預$1,100 左右；香草航空時間最靚，有凌晨機去晚機返，大約一個月出一次優惠，最大問題係寄艙行李收費，20 KG每程收$304，比其他貴百幾蚊，一般優惠價為$1,000至$1,200；HK Express 勝在優惠夠多，差唔多每兩星期一次細優惠，而一季一兩次連稅六百嘅大優惠最易買就係東京線。一日有四班航班，同時亦可以飛羽田，但想買靚時間平飛要起碼半年前買先有。
至於達美因為3月底後停航，所以小編都無寫了。
02 | 大阪
同樣地大阪係國泰Fanfares 嘅出現率係一個月一次，價錢大約由$2,400至$2,800 不等；ANA 雖然有兩件23 KG行李，但係航班時間係午去早返，無左兩日。印度航空就有時候都幾平下，而且早去午返，可以舒舒服服咁玩。
三間廉航之中，樂桃可以凌晨機去晚機返，玩盡每一日，但起碼出發4個月前先買到靚時間。而HK Express 暫時一日有三班機，可以早去晚返，呢兩間都經常有優惠，大約兩三星期一次，$1,300 左右即可入手，建議集中火力主攻呢兩間；而Jetstar 凌晨機去下午返，優惠比較少，一個月先有一次，入手價約$1,300，萬一樂桃/HK Express 無平或者無心水時間拎黎補票最岩。
03 | 名古屋/福岡
名古屋/福岡比較起其他航點出現係國泰/港龍Fanfares 嘅次數仲低，要撞岩時間及航點難過登天，出發日子係Flexible就另計；ANA 飛名古屋時間太差，要午去早返同大阪一樣都好難落手買。
反而名古屋或福岡嘅話，長榮/華航轉機都可以考慮，尤其係Last minute 甚至連廉航都唔減價嘅時侯，轉機$2,400至$2,600 包行李絕對可以接受，仲可以一票兩地玩埋台北。
廉航HK Express 早去午返/午去晚返時間幾靚，而價錢比起國泰/港龍平一半。$68/$88 大優惠賣過史上最平來回福岡連稅$457，名古屋$567，平時普通優惠連稅約$1,200 左右，但通常平飛唔多，入手價小編認為係$1,400，比東京/大阪高一點。
04 | 沖繩
除非有港龍情意結，如果唔係真係唔太抵；而港航每季有一Click 即享優惠，請預早半年留意，價錢預計約$1,500至$1,700。
廉航樂桃價錢絕對抵玩，大約每兩三星期出一次優惠，預早三個月睇定差唔多，雖則唔係日日有航班，但遇正優惠買到$1,200以下來回連稅無難度。
05 | 廣島
來回廣島既直航機只有港龍同 HK Express，港龍票價長期都處於 $4,000，除咗 fanfares之外其他都唔抵買。至於 HK Express，平時 promotion 都只係做緊千幾蚊左右。
06 | 宮崎、熊本
上年香港航空就開咗九州既宮崎同熊本，時間都唔錯，早去傍晚返，價錢為來回連稅宮崎$2,370、熊本$2,470，所以呢兩個地方入手價大約係$2,600就差唔多，官網有長期優惠。但小編覺得除非你係非傳統航空不搭，如果唔係坐返HK Express去福岡再坐新幹線去好過啦！
07 | 北海道札幌
直航機只有國泰同港航。國泰就算有減價都貴過去歐洲，fanfares又好少有，所以可以直接無視。港航一 click 即享就長期都做 4千幾蚊連稅嘅價位，直航嚟講算幾抵！
另外想再平啲可以考慮坐長榮/華航喺台北轉機，或者坐廉航去東京/大阪轉內陸機。日本內陸廉航有 Jetstar / 香草/ 樂桃，經常有減價。撞正優惠 4 程機加埋入手價預$2,500 左右。
【結論】
1.想平坐傳統航空有 3 個方法：
- 靠運博 Fanfares，中獎率極低
- 提早半年捕實 ANA/日航減價，唔使諗即買。
- 提早半年捕實港航「一Click 即享」優惠飛沖繩
2.唔怕核突時間或勁貴寄艙行李嘅話，就揀 Jetstar 同香草，普遍較平，入手價為$1,200 至 $1,300。HK Express 近排每逢星期一晚都有減價，同埋記住得閒上佢官網 Search 下，話唔定有驚喜，佢大約 3 個月左右出一次全線$68/$88 超級大優惠，通常會賣半年至一年後出發嘅機票，來回連稅六百左右，勁抵！搶唔搶到就睇彩數啦！樂桃航空每兩三星期翻炒一次優惠，但想買靚時間必須要 4 個月前訂飛。仲有一個小 Tips，樂桃通常出優惠會連住出，即係出咗香港出發優惠之後，隔一日會出日本出發優惠，如果分開兩程買，比起買香港來回再平約$100 至$200 。(當然前提係兩程都要買到減價飛….)
3.記住：買廉航一定要撞正有優惠先買！！同埋廉航可買單程，比較下唔同價錢，自制兩張單程夾埋來回可能仲平時間仲靚，甚至可以不同城市來回！
至於公眾假期旺季？唔洗諗架啦，9 成 9 都無平。
延伸閱讀：
大阪USJ 15週年3款快證登場！
復活節短線遊｜日本 3 大必玩景點
如置身千與千尋世界中 | 日本千葉縣「天空之鏡」
最新的日本入境要求詳情？
在入境日本前，建議先用Visit Japan Web完成一部分檢疫手續，便能更快速地入境日本，即睇使用教學，例如註冊步驟及同行家人如何填寫等，以及買定日本電話卡。
大阪有什麼好去處及景點推介？
大阪自由行必去這些景點，當中包括USJ大阪環球影城，即睇USJ門票及交通攻略。然而，去旅行怎可忽視美食部分？必到這些人氣美食餐廳，當中更有蟹宴放題、平價米芝蓮餐廳之選。另外，不得不到溫泉旅館/按摩店、溫泉主題樂園、全新門真大型三井Outlet商場及臨空城OUTLET。準備到日本賞櫻花的大家，可預先一看日本櫻花花期預測。