撰文：AY｜圖片來源：GOtrip編輯部
一人一個旅行之匪夷所思
鄭中基曾在Facebook推出以「一人一個旅行之匪夷所思」為主題，收集網民意見，帖文亦引起網友熱烈討論，GOtrip編輯亦有響應分享旅行趣聞，更有不少網友留言分享旅行的有趣經歷，當中有靈異、有搞笑，亦有暖心經歷，令人大開眼界！
1. 歐遊畀人打劫都有價講
我試過一個人去歐遊，機場攞行李已經成個行李唔見咗，然後到hostel中間遇劫匪，佢開價1,000 euro講價到10 euro畀咗佢，原來比人打劫都有價講！
2. 旅行團無通知，到機場班機已飛走
人生第一次搭飛機去旅行，在澳門報團，由澳門搭船經香港飛，去到機場完全搵唔到個領隊，亦唔見有任何團友，打電話去香港嘅旅行社，問點解嘅？回覆竟然係：對唔住呀！因為全團都係香港人，得你兩個澳門人，N日前飛機安排上出現了點問題，通知晒所有團友，飛機會早一個鐘飛，但忘記咗通知澳門戈邊旅行社，班機已走咗了，依家我地即派一個員工飛車嚟機場，安排下一斑最快嘅飛機俾你兩位飛吖。。。戈刻我言了。最後補上一句：提提你，當地今天是假期，未必搵到員工响機場接你地機join番D團友，若真係咁不幸。你响機場再打長途俾我地（香港旅行社），睇下可以點幫到你⋯⋯
3. 好心做壞事，被指厚多士！
我試過…一個人去外國旅行，見到有一對老夫婦
(A)幫另一對老夫婦(B)影相..我懶好心行過去話：我幫你地影呀。佢地拒絕咗，我以為佢地怕醜，我再堅持佢哋一齊過去影…影完後我先發現…..原來佢地係唔識嘅…從此B夫婦嘅相機就多咗一張同陌生人(A)嘅合照…我嗰下真係覺得自己厚多士到一個點😅。
4. 去北韓，Pocky當煙仔孝敬軍官
幾年前去北韓旅行，坐火車入咗北韓境嘅時候會有軍官上車檢查每卡車廂。導遊之前話過檢查完之後要俾包煙佢哋。檢查完之後個軍人冇走到，有少少示意我哋孝敬下佢嘅意思。但係我哋個包廂冇人食煙，我即刻拎咗包Pocky比佢，叫佢一齊坐低食，仲傾得幾開心。
5. 誤信APP去錯公墓
比app亂點咗去基隆第一公墓
6. Check in去錯殯儀館
我同老公，家姐帶住年邁的母親去日本福島環島自駕遊，行程其中一天因天氣關係，那天落好大雪，遲了到達某個郡，到達已經晚上8點，加上母親因有糖尿，不能太餓，我們開始急了…GPS終於到達我們要找的旅居，再望望招牌（全日本字），應該冇錯（因全街只得一開著燈），我們心急想盡快安頓我媽咪入房，加上日本晚上8點已經好夜，又怕日本人以為我地放飛機，連晚餐的一泊兩食都冇埋，到時就慘了（街上已經沒有任何商店營業），到達泊好車，好快手落車推著幾喼行李直奔旅居 Reception，入去櫃檯前冇人，只好按檯前的鈴鐺，噹噹噹…心想希望職員未瞓，希望仲有得食飯啦，同一時間家姐為了快捷，已經由行李取了全部人passport 出嚟等check in，終於有人前來，用好奇怪的眼神望我們一家人，我心想是否我們太遲佢連房間都取消埋？
我家姐二話不說全部passport 推出嚟話：check in check in。跟住兩個日本人不斷用日文不斷推返啲passport 比我哋。但我地又唔知佢講乜，感覺上好似叫我地走，我地唯有係咁say sorry，用簡單英語話我地因天氣關係遲到等等希望佢哋見諒，但依舊推返啲passport 比我哋。
在我家姐同職員交談期間，我看見啲人客出出入入都用好奇怪的眼光望著我們，我心想啲人做乜咁夜仲出出入入嘅？經一輪雞同鴨講的時間，終於找了一個比較後生的職員出來，但他英文一樣屎，最後佢簡單問我地booking嘅記錄，他指住我的booking紙說not there，我地才恍然大悟（咁這是什麼地方），個後生職員用有限英文解說這裏是……殯儀館，啋啋啋…仲話要chech in，話電話no.啱（GPS是入當地電話號碼），但温泉旅居一直冇更新所以我哋嚟錯，之後個職員好好，佢自己行路叫我哋揸車跟住佢，佢帶我哋到達温泉旅館。這經歷除了好笑之外，見得出日本人好有禮貌及耐性，加上咁凍天氣帶我地去又自己行返嚟（其實都唔關佢公司事，佢仲要跑步帶我地去都要10分鐘），我相信只有日本人才會這樣做。
7. 望到靈體穿牆
往日本廣島旅行，於酒店房內親眼目睹靈體穿過牆壁(好似有一道門咁樣)進入我間房再向門口方向行去…….最驚嚇係佢回頭望我一眼……當時情景至今還印象深刻。
8. 當年未有Google大神，差啲瀨嘢
當年仲係用緊Nokia，未有手機Google 大神，自己一個人自由行去遊大阪，行程都好順利，但點知走嘅時候去機場返香港，差啲出事⋯⋯
話說當時要坐JR去機場，已經問好哂（身體語言）站內某個月台等車，企喺度等等，發現企隔離無遠，有對男女係咁望住我又講下嘢，我當時就奇怪，我有乜嘢畀佢望？我就對個女士微笑一下，佢就即刻走埋來對我講 Can you speak English ?
我答Yes !佢就繼續用純正英文問我係咪去機場？
我答Yes!
佢就即刻解釋比我知，我企錯位，去機場係要企車頭位置，因為只有第一卡車係去機場！
嘩嘩！我心都離埋，即刻唔該哂佢，拖行李跑去車頭位置，剛好車到，上咗車行10分鐘，就見到我坐嘅第一卡，同後面車卡分開，後面車卡係去和歌山，如果唔係呢位女士好心講我知，我就真大鑊，繼續Stay Behind！
